Onnodige spelfoute kos belastingbetalers geld

Harry Hill, Mosselbaai:

Ek het in Maart 2021 ‘n spelfout op die rigtingaanwyser op die hoek van Market- en Kerkstraat na die Harry Giddeypark skriftelik onder die aandag van die munisipale bestuurder gebring. Dié weldoener van Mosselbaai se van word foutiewelik as Giddy op die aanwyser gespel. Dit is ook ‘n fout wat die belastingbetalers van Mosselbaai oor die jare al baie geld gekos het omdat aanwysers na, en borde by die park, reggestel moes word.

Ontvangs van my brief in 2021 is erken, en so ook toe ek weer op 24 Maart 2022, 11 April 2022 en 11 Mei 2022 skriftelik by die munisipale bestuurder daaroor navraag gedoen het omdat die fout steeds nie reggestel is nie. Behalwe die geoutomatiseerde ontvangserkennings het ek egter tot vandag toe nog nie antwoorde van die munisipaliteit op my briewe ontvang nie. Die soort slordige werk is ongelukkig ook elders sigbaar.

Cecil Shepherdstraat (korrek) word, byvoorbeeld, op party plekke as Cecil Shepperdstraat gespel. Hofmeyrstraat (korrek) word ook verkeerdelik as Hofmeyerstraat gespel. Die alternatiewe spellings in Hofmeyrstraat verskyn selfs op teenoorgestelde straathoeke! Albei strate is na gesiene oud-inwoners van die dorp vernoem om hulle te vereer.

‘n Mens kan net hoop dat die foute reggestel sal word, en dat doodgewone hoflikheid aan belastingbetalers betoon sal word deur hul briewe te beantwoord om reg te laat geskied aan die munisipaliteit se reputasie as een van Suid-Afrika se beste munisipaliteite.

Kommentaar, Mosselbaai-munisipaliteit: Volgens die Mosselbaai-munisipaliteit se rekordstelsel, waarin die tersaaklike korrespondensie aangaande die Harry Giddey-naamboord deeglik nagespoor is, het die skrywer van beide Joubert Coetzee (senior bestuurder: ondersteuningsdienste) asook die wyksraadslid Lodewyk Coetzee per e-pos ‘n respons op die navraag ontvang.

Volgens Carel Venter (direkteur: beplanning en ekonomiese ontwikkeling), is die rigtingwyser by die nuwe toerismestasie, soos uitgewys, reeds reggemaak. Die munisipaliteit het deurgaans gepoog om korrekte spelling vir die plekname te bevestig tydens die uitrol van die toerismestasiesprojek, maar blyk dit tog dat verskillende bronne verskillende spelwyses voorhou. Insette soos hierdie is waardevol en help met korrekte spelwyses.

Die straatname wat ook in die skrywe genoem word, is verwys na die tersaaklike direktoraat wat daaraan aandag gee. Die Mosselbaai-munisipaliteit verwelkom gesprekvoering met inwoners aangaande diensleweringsnavrae.