VLV onthaal brandweer en Helpende Hand
Na Junie se geslaagde Bingo-oggend het die Klein-Brakrivier VLV-tak tydens hul maandelikse vergadering op Dinsdag, 26 Julie, 'n besoek van verteenwoordigers van Helpende Hand asook die brandweer ontvang.
Na die onlangse verwoestende brande in die Wolwedans-woongebied, het brandweerman Jowin
Losper van die Mosselbaaimunisipaliteit belangrike inligting, noodsaaklike wenke en raad verskaf wat lewens tydens ‘n brand kan red.
Marlise Labuschagne, Suid-Kaap areabestuurder van Helpende Hand, het die rol van Solidariteit Helpende Hand as 'n gemeenskapsorganisasie verduidelik. Helpende Hand fokus op opheffing deur middel van opleiding en hulle dienslewering strek van kinders tot bejaardes. Hulle fokus daarop om armoede te verlig deur mense selfstandig te maak en jongmense voor te berei vir die wêreld van werk. Hulle poog om gemeenskappe in staat te stel om kort- en langtermyn oplossings te vind vir die nood in hul eie omgewing.
Helpende Hand se dienste word, soos die vyf vingers van 'n helpende hand, in vyf temas verdeel. Deur hierdie temas word mense se lewens blywend verander: Ontwikkeling, Opleiding, Ondersteuning, Onafhanklikheid, en Omgee. Solidariteit Helpende Hand funksioneer binne die Solidariteit beweging as 'n maatskappy sonder winsoogmerk, en moet eie fondse genereer.
Soos gewoonlik was daar ‘n marktafel vir aankope en lootjies wat lede en gaste kon wen. Op ‘n ligter en ritmiese noot, het ‘n groep lyndansers - Janine Kilian, Ansie Visagie, Berta van Loggenberg en Lenie Grobler - almal se voete laat jeuk.
Die insiggewende oggend is gekoördineer onder leiding van Beulla Kirstein, openbare sake portefeulje sameroeper, en haar span voorslag gasvroue - Jenny Spangenberg, Martie Wentzel en Miens Willers.
Amanda Marais van Provision Wellness gaan op 30 Augustus by die Klein-Brakrivier se Vroue Landbou Vereniging in die Reebok Gemeenskapsaal kuier. Bespreek nou die datum in jou dagboek.