Skryf jou wenbraaibroodjie in
'n Braai is mos nie 'n braai sonder 'n braaibroodjie nie, of hoe? Group Editors se gemeenskapskoerante loods elk 'n braaibroodjie-kompetisie. Die Mossel Bay Advertiser daag inwoners uit om hul resepte vir die geleentheid in te skryf, want wat is dan nou lekkerder as 'n braaibroodjie?
Die paneel van beoordelaars bestaan uit Mosselbaai se burgemeester, Dirk Kotzé, sjef Suzaan Rauch en joernalis, Louise Karsten.
Dirk Kotzé
Kotzé sê 'n braaibroodjie is vir hom soos "poeding saam met braaivleis". Hy sê sy vrou sit 'n geheime bestanddeel op die broodjie wat dit ekstra lekker laat smaak. Kotzé wil egter nie bekend maak wat hierdie geheime bestanddeel is nie. Indien hy homself nie voltyds in die politiek bevind het nie, sou hy 'n voltydse sakeman en entrepeneur gewees het. Hy is lief vir braai en braai minstens een keer 'n week.
Suzaan Rauch
Rauch het by die noemenswaardige Warwick Sjefskool studeer en bedryf die Artizaan kombuis by Prince Vintcent Square op Mosselbaai. As daar iemand is wat weet hoe die perfekte braaibroodjie proe, is dit verseker sy. Haar broodjies proe soos liefde, as liefde na iets kan proe. Rauch sê sy hou van 'n braaibroodjie met 'n mengsel van kaas, pesto en ryp tamatie. "Ek is baie opgewonde om te sien watter geheime braaibroodjieresepte Mosselbaaiers vir ons wegsteek," sê sy. Indien Rauch nie haarself in die kosbedryf bevind het nie, sou sy graag 'n joernalis wou wees.
Louise Karsten
Karsten is lief vir braai en daar is vir haar niks lekkerder as 'n groot vuur nie. Sy trek haar neus op vir charcoal en braai slegs met hout. Sy hou nie van gebrande brood nie en sê die lewe is te ingewikkeld vir ingewikkelde braaibroodjies. "Ek is ouskool as dit by braaibroodjies kom. Kaas, uie, tamatie en 'n bietjie blatjang doen dit vir my. Maar ek sien uit daarna om my horisonne op die braaibroodjiefront te verbreed en wil graag iets nuuts probeer."
Karsten is lief vir kosmaak en eksperimenteer graag. Voor sy in die joernalistiek studeer het, het sy dit sterk oorweeg om 'n sjef te word.
Groot pryse is op die spel. Skryf jou resep in voor 12 Augustus.
Die finaliste sal genooi word na die finale geleentheid in September.
Stuur jou resep na mba@groupeditors. co.za en wie weet, miskien is jy Mosselbaai se braaibroodjie-meester!