Slaan self stres vir ‘n ses
Die vroue van VLV-Voëlvlei het ‘n leersame vergadering gehad oor hoe om maklike stresbrekers te gebruik om stres hok te slaan.
Seraldi Serfontein, ‘n kenner op die gebied, het beklemtoon dat oormatige stres negatiewe gevolge soos hoofpyne, slaaploosheid, verhoogde bloeddruk en kortasemigheid op die liggaam het.
Sonder om sommer dadelik die chemiese weg met pille te neem, is daar ‘n paar stresbrekers wat binne elkeen se bereik en boonop goedkoop is.
Heel eerste is diep asemhaling. Dit laat jou dadelik ontspan. En om dit ‘n prettige oefening te maak, kan jy saam met die kinders, of alleen, seepborrels blaas. Dis ook belangrik om sosiaal te verkeer en met mense persoonlik te gesels eerder as op sosiale media. Kuier en lag saam. Wees kreatief en ontdek nuwe vaardighede. Die waarde van diere en die interaksie met jou troeteldiere is ook baie goeie terapie vir stres. Selfs net die dophou van voëls of ander diere kan jou laat ontspan. Om kaalvoet in die natuur tyd deur te bring en te stap, bring ‘n nuwe perspektief en verlig stres. Oefening kan selfs op die bed gedoen word deur byvoorbeeld die alfabet met jou voete te ‘skryf ’!
‘n Belangrike oorsaak van stres op die liggaam is verkeerde eetgewoontes. Voorbeelde van gesonde voedsel as ‘n teenvoeter vir stres op die liggaam, is onder andere donker sjokolade, neute, bessies, avokado, lemoene, olierige vis, groentee, kaneel en aarbeie.
Van die bestuurslede het insette op die vergadering gelewer. Linzetta Smit het vertel van die ontstaan en geskiedenis van die VLV-tekstielmuseum in Stellenbosch, en ‘n besoek sterk aanbeveel. Cathy Klaassen het met die mooiste serpe gewys hoe om dit op verskillende maniere te dra en spoggerig te lyk.