Rekord aantal rondtes by Mosselbaai-gholfklub
Die koue en soms reënerige weer gedurende Julie het nie spelers se gees gedemp of van die Mosselbaai-gholfbaan af gehou nie. Inteendeel, ‘n rekord aantal rondtes (3 865) is gedurende die afgelope maand aangeteken wat byna 200 rondtes meer is as in die ooreenstemmende tyd verlede jaar. Die aantal rondtes vir die jaar, staan reeds op ‘n allemintige 29 652.
Sakemannedag
Die sakemanne het oudergewoonte hul heerlike geborgde dag op Woensdag, 27 Julie aangebied. Die gekombineerde Stablefordkompetisie het vereis dat elke speler sy allerbeste moes lewer. Die egpaar, Steve en Irené Schoeman, het hulle jarelange samewerking ook op die spel toegepas en die 77 punte wat hulle opgestapel het, was genoeg om as oorwinnaars gekroon te word.
Die pa-en-dogter kombinasie van Hilton en Jodie Duminy, het ook vrugte afgewerp en op 75 punte was hulle die naaswenners. Klubkaptein, Michael Rehr, het ook vir ‘n wyle sy pligte opsygeskuif en saam met die talentvolle, opkomende speler, Aldrich Potgieter (bruto 64 houe vanaf ‘n +6 voorgee), die derde plek met 74 punte verower.
Saterdag
Yskoue winterweer het spelers begroet wat Saterdagoggend, 30 Julie, aan die Beterbal Stablefordkompetisie wou deelneem. Die dag het egter pragtig uitgedraai en is deur ‘n groot aantal spelers geniet. Attilio van Niekerk en Gavin Wales was die gewilde wenners op 44 punte in die Beterbal Stablefordkompetisie.
Die tweede tot vyfde plekke moes met behulp van die uitklop-proses bepaal word en Tony Muller en André Zeelie (42 punte) is as naasbestes gekroon. Die egpaar, Wiekus en Annette Pretorius, het derde geëindig.