Unieke geleentheid saam met premier Alan Winde
Kort op die hakke van die opening van die gesamentlike beheersentrum (JOC) verlede week, toe die Wes-Kaapse premier Alan Winde en verskeie WesKaapse ministers die dorp besoek het, is daar ‘n unieke geleentheid volgende week om die premier en sy kabinet in D’Almeida te ontmoet.
Lede van die gemeenskap word uitgenooi om vanaf 17:00 hulle voorstelle en kwessies met Premier Alan Winde en sy kabinet te deel.
Die gesprekke vind by wyse van vyf minute lange, een-tot-eengesprekke plaas.
Voorkeur word gegee aan persone wat eerste opdaag waarna beurte afgewag sal word.
Die daaropvolgende dag, vergader die Wes-Kaapse premier en kabinetslede met al die burgemeesters en munisipale bestuurders van die Tuinroete by die Mosselbaai-stadsaal.
Die besonderse geleentheid volg nadat die munisipale bestuurder, Colin Puren, verlede week na afloop van die suksesvolle opening van die gesamentlike beheersentrum, ‘n versoek aan die premier gerig het om die byeenkoms van George na Mosselbaai as gasheerdorp, te skuif.
Premier Winde het tevore aangedui dat hy van voorneme is om die fokus te plaas op munisipaliteite wat die leiding neem deur die premiersforumvergaderings daarheen te skuif.
In die lig van die onlangse opening van die gesamentlike operasionele sentrum (JOC), wat allerweë as 'n voorbeeld van beste praktyk beskryf word, het die premier besluit om die sitting vanaf George na Mosselbaai te verskuif.
Die besluit het gevolg ná 'n uitnodiging van die munisipale bestuurder, Colin Puren, wat die premier aan sy onderneming herinner het tydens die JOC se amptelike opening verlede week.