Asbeswaterpyplyne by Da Nova vervang
Da Nova, een van Mosselbaai se oudste buurte kry eersdaags sy opgraderingsbeurt wanneer die bestaande asbeswaterpyplyne, vervang sal word. Ten einde die impak van ontwrigtende uitgrawingswerk tydens die projek te verminder, word gebruik gemaak van pypbrekingtegnologie om die nuwe stelsel in plek te kry. Die Mossselbaai-munisipaliteit sal die aanvangstyd van die projek nog bevestig, maar versoek die gemeenskap om intussen kennis te neem van enkele ontwrigtings gedurende die opgradering.
Die strate wat hierdeur geraak sal word is MJ Harris-, Con van der Wath-, Da Gama-, Ken Andrew-, Protea-, Sao Bras- en Ryk Tulbaghstrate. Volgens die projekbestuurder, Martyn le Roux van Neil Lyners Konsultante, sal die projek ongeveer vyf tot ses maande duur tot voltooiing.
Die projek sal tot gevolg hê dat inwoners onderbreking van normale watervoorsiening ondervind. Dit sal aangespreek word deur middel van die verskaffing van tydelike wateraansluitings. Die rede vir die opgradering is aangesien die bestaande asbeswaterpype gereeld waterbreuke veroorsaak wat waterverliese tot gevolg het. Die asbespype word nou deur ‘n hoë digtheid poliëtileen-pype vervang.
Die pybreking-tegnologie wat ingespan word, behels dat die hoë digtheid poliëtileenpype met behulp van masjinerie deur die bestaande asbespyplyne getrek word. Die voordeel hiervan is dat die omgewing waar gewerk word, minder versteuring veroorsaak. Boonop is daar baie rotse in die area waar die beplande werk gedoen word. Deur pypbreking te gebruik, word uitdagings soos om rotse te verwyder, verminder en daar is boonop minder stoornis wat die gemeenskap betref. Die tipe plastiekpyp wat gebruik word is buigsaam en kan dus teen verskillende hoeke deur die bestaande pypnetwerk getrek word. Die gemeenskap word versoek om die areas waar daar gewerk word, liefs te vermy. Daar sal ook ‘n stop-en-ry-punt wees om die verkeer te reguleer. Aangesien die bestaande asbespype meestal geleë is waar bestaande paaie is, is dit verkieslik dat so min verkeer moontlik deur die areas beweeg gedurende die opgraderingsperiode. ‘n Werksbasis sal ten tye van die projek by die substasie in MJ Harrisstraat opgestel word.