Reaksie op brief misleidend

Harry Hill, Mosselbaai:

Die Mosselbaai-munisipaliteit se reaksie op my brief oor spelfoute op rigtingaanwysers op die toerisme-roete na die Harry Giddeypark is misleidend en teleurstellend.

Dit bevat ook ‘n onwaarheid aangesien die aanwyser op die hoek van Markstraat en Kerkstraat (voor Mosselbaai Toerisme) op die publikasiedatum van die reaksie op 5 Augustus nog nie reggestel was nie. Dit was op 8 Augustus, 2022 steeds foutief.

Die fout op die aanwysers is die eerste keer op 24 Maart, 2021 skriftelik aan die munisipale bestuurder gerapporteer in belang van die dorp se openbare beeld. Dit is op 10 Maart, 2022 en weer op 11 April, 2022 skriftelik opgevolg omdat die aanwysers steeds foutief was. Behalwe die outomatiese ontvangserkennings, is steeds geen reaksie oor die onderwerp ter sprake ontvang nie.

Die munisipaliteit se versuim is op

11 Mei, 2022 direk met mnr Joubert Coetzee opgeneem aangesien sy afdeling verantwoordelik is vir die verspreiding van korrespondensie, en die monitering van die afhandeling daarvan. Hy het onderneem om dit te ondersoek, maar my oorspronklike korrespondensie oor die tersaaklike aangeleentheid is steeds geïgnoreer. Die foute is ook nie reggestel nie. Raadslid Lodewyk Coetzee, wat ongelukkig nie briewe namens die munisipale bestuurder kan beantwoord nie, het wel gereageer toe ek hom in Maart 2022 op die korrespondensie ingekopieer het.

Hy het my probeer oortuig dat ‘n fout wat waarskynlik nie meer as R2 000 sou kos om reg te stel nie, en in die 2020/2021-boekjaar begaan is, eers in die 2022/2023-boekjaar reggestel sal kan word.

Direktoraat van infrastruktuurdienste se afdeling paaie, vervoer en stormwater, reageer:

‘n Bestelling is by die verskaffer wat die tender vir straatname ontvang het, geplaas. Die munisipaliteit wag daarop om die straatnaamborde met die korrekte spelling in ontvangs te neem waarna dit die bestaande naamborde sal vervang. Dit sal na verwagting voor die einde van Augustus plaasvind.