Bekendstelling van 7’s wêreldbekertrofeë
Oudtshoorn Courant, ‘n publikasie van Group Editors, was vroeër vandeesmaand deel van ‘n kleedkamerervaring by die DHLrugbystadion in Kaapstad waartydens beide die mans en vroue 7’s wêreldbekertrofeë deur Neil Powell (Blitzbokke-afrigter) bekend gestel is. Suid-Afrika bied vanjaar dié skouspel, wat deur Castle Lite geborg word, vanaf 9 tot 11 September by die einste DHLstadion aan wat ook 'n eerste vir Afrika is.
Hierdie swierige geleentheid is bygewoon deur verskeie hooggeplaastes, mediahuise van oor die land, sowel as plaaslike vermaaklikheidsterre wat onder meer Maurice Paige (akteur), Dee Koala (musikant) en Reyle Rene de Morney (mediapersoonlikheid) ingesluit het.
Tydens die bekendstelling in die kleedkamer het Powell alle rugbyondersteuners aangemoedig om in hul duisende by die stadion op te daag in wat hy beloof het 'n ervaring propvol adrenalien sal wees.
"Diegene wat nie fisies hier kan wees nie, moet ons op hul TV-skerms ondersteun en die aksie volg soos wat dit ontvou," het hy gesê.
Die Blitzbokke is vanjaar die gunsteling om met die louere by die wêreldbeker weg te stap weens hul onlangse goue medalje by die Statebondspele (Birmingham, Engeland) waar hulle 'n gedugte Fidji in die eindstryd met 31 - 7 behoorlik karnuffel het. Die Blitzbokke se sterspeler,
Angelo Davids, het gepas die toernooi afgesluit met 'n allemintige 10 drieë.
Sedert die eerste Seweswêreldbeker in 1993, kon die tuisspan nie daarin slaag om dié beker huis toe te bring nie; vanjaar wink daar egter 'n guldige geleentheid om die bordjies te verhang voor hul tuisskare.
Powell het bevestig dat hul sege by die Statebondspele net die regte doepa was om die span broodnodige momentum en selfvertroue te gee.
"Ja kyk, ons oorwinning oor Fidji was ideaal in terme van die aanloop tot die wêreldbeker en die manne is oorgehaal om hul vorm voort te sit.
Tans beskik ons oor 20 spelers wat gereed is om te baklei vir die wêreldbeker, so ek is redelik tevrede met ons groep se diepte indien ontydige beserings kop uitsteek. Alhoewel Davids 10 drieë kon druk, wat 'n besondere prestasie is, sal hy die eerste een wees wat erken dat dit sy spanmaats is wat dit vir hom moontlik gemaak het.
Hy is egter 'n amazing speler op en van die veld wat baie na die span bring."
Wat sy eie afrigtingsfilosofie- en tegnieke betref, het Powell gesê dat hy nie die spreekwoordelike wiel sal herontwerp wat sukses gebring het nie.
"Verseker sal die span sy spelpatroon aanpas afhangend wie die opposisie is, maar nie soveel so dat ons die ouens deurmekaar maak nie, so bestendigheid in benadering sal definitief die wagwoord wees," het Powell benadruk.
Castle Lite se handelsmerkdirekteur, Colleen Duvenage, het op haar beurt aangekondig dat daar 'n spesiale "Fan Village"- pretarea slegs vir kaartjiehouers sal wees.
Kaartjies verkoop reeds soos soetkoek by die amptelike kaartjieagentskap (Ticketmaster) via die webwerf www. rwcsevens.com. Die publiek kan ook 'n kans staan om voldagkaartjies vir die duur van die toernooi te wen indien hulle aanteken by www.castlelite.co.za.
Kaartjiepryse wissel van R150 tot R1 750.