Barbarians wen Jaguars op Plettenbergbaai
'n Begeesterde Barbarians-rugbyspan het verlede Saterdag vir Jaguars, op hul tuisveld in Plettenbergbaai, met 50-27 geklop. In hierdie wedstryd het die wenspan se dissipline hulle amper weer in die steek gelaat, nadat hulle twee geelkaarte gekry het. Ten spyte van hulle swak dissipline was dit tog een van hul beste wedstryde vir die seisoen.
Barbarians se beweeglike agttal het reeds vroeg hul stempel in die vaste losspel afgedruk. Dit was juis die voorspelers wat die platform vir hierdie welverdiende oorwinning geskep het. Met goeie skrumwerk, lynstane en dryfmaalbewegings het Babaas se agttal die tuisspan se voorspelers by tye onder groot druk geplaas.
Veral Shane Olckers (slot) en Daniel Abrahams (flank) wat Babaas se lynstane oorheers het, verdien krediet. Saam met hierdie twee het Fernando Fourie (slot) ook ‘n barshou gespeel. Abrahams wat die beste onder die voorspelers was, het meer as 60m gehardloop vir 'n fantastiese langafstanddrie. Hierdie drie het gekom ná goeie samespel tussen voor- en agterlynspelers.
Die agterlyn met Shadward Fillies (buite senter) en Josh Hermanus (linker vleuel) aan die spits, se aanvallende spel het die skare op hul voete gehad. Fillies wat drie keer agter die doellyn gaan kuier het was ook aangewys as beste agterlynspeler van die wedstryd. Macdellin Saayman (losskakel) se taktiese skoppe het Babaas gereeld op die aanval geplaas.
Indien Babaas wil voortbou op hierdie goeie vertoning, sal hulle ernstig moet aandag gee aan hul dissipline, want die Crusaders en Progress is hul volgende teenstanders.
Vir die Barbarians het die volgende spelers drieë gedruk, Shadward Fillies (drie), J Hermanus (twee) en Daniel Abrahams, Curshie Mono en Daine Kannemeyer (elke een drie). Macdellin Saayman slaag met vier doelskoppe, terwyl Josh Hermanus ook ‘n doelskop deur die pal stuur.
Ander uitslae
Babaas B-span 38 - Jaguars 3
Babaas C-span 15 - Jaguars 10.