Tafelaars deel in braaibroodjiekompetisie
Round Table Mossel Bay 32 vat hande met die Mossel Bay Advertiser-span tydens die Advertiser se braaibroodjie-kompetisie wat op Saterdag, 17 September plaasvind. Die geleentheid beloof om baie pret te wees en vind by die Koswerf Restaurant van die ATKV-oord op Hartenbos plaas.
Die topvyf sal op die betrokke dag om 13:00 hul braaibroodjies vir die beoordeelaars braai.
Inwoners is welkom om die geleentheid by te woon. Elke finalis sal minstens ses tot agt broodjies braai sodat die publiek ook kan proe hoe ‘n goeie braaibroodjie behoort te smaak. Burgemeester Dirk Kotzé, Suzaan Rauch die eienaar en sjef van Artizaan by St Vintcent Square, Suzaan Rauch en joernalis, Louise Karsten gaan die broodjies beoordeel en die algehele wenner aankondig.
Seremoniemeester
Dié Voorsitter van Round Table, AB Tromp sal die braaibroodjie-kompetisie se seremoniemeester wees.
Tromp is ook die visevoorsitter van Round Table Suid-Kaap. Hy is ‘n trotse inwoner van Danabaai en hou baie van braaibroodjies maar is van mening dat ‘n braaibroodjie eintlik as nagereg bedien moet word. Tromp is lief vir koffie en geniet dit om in sy vrye tyd te roei en te stap.
Voormalige voorsitter Paul Hoeksema hanteer tans die portefeulje van Round Table Internasionaal se bemarkingstategie. Hoeksema hou altyd blatjang, kaas en tamatie byderhand wanneer hy ‘n braaibroodjie maak. Hy skrik nie vir ham nie en sit soms sommer ‘n snytjie ham of selfs spek op sy braaibroodjie. Round Table Mossel Bay 32 doen gereeld liefdadigheidswerk. Besoekers aan die geleentheid word dus versoek om op die betrokke dag blikkieskos as skenking saam te bring. Die tafelaars sal dit op ‘n ander geleentheid aan behoeftige instansies uitdeel.
Borge
Die geleentheid sal nie sonder plaaslike borge moontlik kon wees nie. Die Advertiser bedank die volgende borge wat pryse vir die wenners beskikbaar stel: Hartenbos ATKV-oord vir die borg van naweekverblyf vir ses mense. Brink & De Bruin Oogkundiges vir die borg van ‘n Oakley óf Rayban sonbril. Botlierskop vir ‘n wildsrit vir twee mense. Albert Wiffen vir die borg van R400 se geskenkbewys. SSK Agriland Mosselbaai vir pryse ter waarde van R1 000 en Reebok Superette vir die borg van hout.