Wees verantwoordelik met vullis
Die Mosselbaai-munisipaliteit is vir ‘n tweede agtereenvolgende week in bepaalde buurte besig om vullis te verwyder wat onwettig gestort word. Verlede Maandag, 22 Augustus is daar van ‘n laaigraaf gebruik gemaak om vragte vullis in Asla Park by ‘n informele nedersetting te verwyder. ‘n Week later, op 29 Augustus is die poging om die stryd teen vullis te wen, in Asla Park voortgesit. Die koste om maandeliks swaar masjinerie, vir twee weke se gebruik te huur, beloop ongeveer R115 000.
Die Mosselbaai-munisipaliteit het verskeie inisiatiewe en projekspanne in plek wat op ‘n volgehoue basis die stryd teen vullis wat woonbuurte ontsier en boonop ‘n gesondheidsrisiko skep, te voer. Hierdie inisiatiewe sluit in skoonmaakspanne wat spesifiek die strate netjies hou. Daar is spanne wat fokus op oop ruimtes en klowe om onwettige vullisstorting teen te werk. Grassnyspanne werk maandeliks aan die sypaadjies in verskeie areas en ope dae word gehou om die inwoners te help om op ‘n veilige manier van hulle gevaarlike huishoudelike afval ontslae te raak.
Spesiale skoonmaakprojekte en bewusmakingsveldtogte word ook gebruik om spesifieke areas te teiken. Dit sluit onder meer die skoonmaak van die taxi-staanplek in die middedorp in. Hierdie brandpunt waar heemloses dikwels ‘n heenkome vind, word op ‘n maandelikse basis skoongemaak.
Storting van asbes
Dit is kommerwekkend dat groot hoeveelhede asbes toenemend in die veld en oop ruimtes in die dorp se woonbuurte gestort word. Die storting van asbes is onwettig. Dit is ‘n wetlike vereiste dat ‘n geakkrediteerde diensverskaffer asbes moet verwyder volgens vasgestelde riglyne. Munisipalestortingsterreine mag nie asbes aanvaar nie.
‘n Persoon wat asbes onwettig stort kan met tot R100 000 beboet word. Ook diegene wat onwettig vullis of tuinafval stort kan deur die Mosselbaai-munisipaliteit met tot R1 000 beboet word.
Die munisipaliteit stel grootmaatvullishouers beskikbaar op verskeie strategiese plekke waar die publiek daarvan gebruik kan maak.
Die publiek word versoek om aksie te neem teen onwettige vullisstorting en dit aan die Mosselbaai-munisipaliteit te rapporteer by 044 606 5143 of stuur ‘n e-pos na admin@mosselbay.gov.za