Veiligheid gedeelde verantwoordelikheid
Lede van die Uitbreiding 23-buurtwag het op 31 Augustus ‘n stap geneem om die jeug te mobiliseer as jong ambassadeurs vir gemeenskapsveiligheid. Boetie Groenewald, ‘n direkteur van die gesamentlike beheersentrum (JOC), het die oorhandiging van glimbaadjies aan die skolierpatrollie van St Blaize Primêre skool gefasiliteer.
Die JOC is op 16 Augustus geopen en is ‘n eerste van sy soort vir ‘n plaaslike regeringsowerheid in terme van ‘n privaat-publieke vennootskap wat gemeenskapsveiligheid betref.
Tydens die oorhandiging het die voorsitter van die Uitbreiding 23-buurtwag gesê, dat die skool ‘n integrale deel van die gemeenskap vorm waar hulle patrolleer en daarom by veiligheidsinisiatiewe ingesluit moet wees. Philip Mattheus, van die Mosselbaai- en Da Gamaskop-polisiesone se gemeenskapspolisieforum, het die inisiatief om die jeug te betrek, verwelkom. Faggie Johnson van die departement gemeenskapsveiligheid het gesê dat dit ‘n groot fokusarea van sy departement is om skole en geloofsgebaseerde organisasies gesamentlike verantwoordelikeheid vir gemeenskapsveiligheid te laat neem.
Raadslid Rosina Ruiters, self ‘n aktiewe lid van die buurtwag het die leerders geloof daarvoor dat hulle deel is van ‘n veiligheidsinisiatief soos die skolierpatrollie. Sy het hulle aangemoedig om voort te gaan met hulle diens aan die gemeenskap deur hulle skoolmaats te help veilig hou. Die skoolhoof, André Muller het sy dank in verband met die skenking aangedui. Hy het ook van die geleentheid gebruik gemaak om van sy veiligheidsbekommernisse met die buurtwag en die wyksraadslid te deel, wat hulleself verbind het om daarvan werk te maak.
Die skep van ‘n veiliger omgewing is een van die Mosselbaai-munisipaliteit se vyf kernwaardes in terme van die GROEIstrategie vir die volgende paar jaar.