Eisteddfod gekenmerk deur ongelooflike talent
Die 2022 Mosselbaai Eisteddfod het verlede week met groot opwinding begin. Die eerste week wat musiek was, is deur ongelooflike plaaslike talent en entoesiasme gekenmerk. Die uitblinker-deelnemers in klavier, sang, xylofoon, kitaar, viool, ukulele, slagorkeste en kore, het volgens die beoordelaars beslis uitgehaal en gewys. “Die musiekfees het die skitterende toegewydheid van ons musiekonderwysers en begeleiers skerp uitgelig.”
Twaalf kore, met meer as 700 leerders, het deelgeneem en baie aandag getrek. Die hoogs-ervare en gerespekteerde musiekbeoordeelaar, Philippus Hugo, het die algemene musiekstandaard as besonders bestempel en veral die kore geloof vir hulle buitengewoon hoë standaarde. Hy het selfs gevoel dat van die kore op wêreldstandaard is.
Ander optredes
Die spreekkore word vandag, Vrydag 2 September, om 15:00 beoordeel. Dié spreekkore wat uit 10 kore bestaan en meer as 155 deelnemers insluit, beloof ook om die gehoor met hulle talent te beïndruk.
Gróót opwinding heers ook oor die opkomende dansprogram wat op Dinsdag, 7 en Woensdag, 8 September plaasvind. Daar is talle solo-items en ook 20 dansgroepe wat uit 76 deelnemers bestaan. Beide Dinsdag en Woensdag se programme begin om 13:30 en behoort onderskeidelik tot so ongeveer 17:00 en 18:00 te duur.
Besoekers is baie welkom om die verskeie sessies, wat by Hoërskool Punt plaasvind, by te woon. ’n Nominale toegangsfooi van R20 vir volwassenes word gevra. Toegang vir kinders is gratis.
Die Eisteddfod se gala-aand vind op Saterdag, 10 September plaas. Meer inligting is by Abé Meintjes (083 268 3718) beskikbaar.