Lente ope-markdag vir kampeer en buitelewe entoesiaste
‘n Unieke geleentheid wag vir kampeeren buitelewe-entoesiaste met die lente ope-markdag wat die naweek van 10 en 11 September by Die Punt-karavaanpark gehou word.
Bring al jou ongebruikte kamp- en buitelewe-toerusting en verkoop dit vanaf jou eie staanplek. Enige item, soos bote, jetski’s, visvang-toerusting, duikpakke, tente, karavane, braai’s, braaitoerusting en vele meer mag verkoop word. Die koste vir so ‘n uitstal-staanplek is R260 vanaf Saterdag, 10 September om 09:00 tot Sondag, 11 September om 15:00.
Vyf vanotels is ook beskikbaar vir bespreking teen R600 elk. ‘n Vanotels is ‘n gerestoureerde karavaan wat gehuur kan word en waar jy stres-vry kan kampeer, omdat alles wat jy nodig het, reeds in die karavaan is. Al wat jy saambring, is jou eie beddegoed.
Die ope-dag is Saterdag vanaf 09:00 tot 15:00 en is oop vir alle belangstellendes. Toegang is heeltemal gratis. Parkeer jou voertuig buite en stap op jou tyd deur die park om die verskeidenheid stalletjies te besigtig en te geniet. ‘n Verskeidenheid stalletjies gaan heerlike kossoorte aanbied, om die hongerpyne te stil. Van dié stalletjies is, Curry King se Durban curries en bunny chows, Coffee and Treats 2 Go asook Eddie’s steak, biltong en gewilde boerie-rolletjies. Daar gaan ook vetkoek te koop wees en die snoepwinkel is oop vir nog lekkernye.
Verskeie besighede, wat in kampeertoerusting spesialiseer, gaan ook by die ope-markdag uitstal. Hierdie uitstallers sluit in, Tuinroete Kampeer en Karavane, Surf’s Up, Garden Route Scuba Diving, Hartenbos Karavane, Romanza/ Aquamarine Boat trips en White Shark Africa.
Vir meer inligting en die bespreking van stalletjies en verblyf, skakel 044 690 3501.