Babaas val vas teen Crusaders
Crusaders van George wat hierdie jaar die bo-toon voer in die SWD senior klubkompetisie het verlede Saterdag, 27 Augustus weer eens Barbarians die loef af gesteek in hul tweede kragmeting van die jaar. Barbarians, wat hierdie wedstryd met 29-54 op Crusaders se tuisveld verloor het, sal die komende rugbyseisoen definitief met nuwe durf moet aanpak.
Crusaders wat vanaf die afskop met mening aangeval het, het vroeg in die eerste helfte twee keer agter die pale gaan kuier. Kort daarna het Clinton Wannies (skrumskakel) van Babaas, met goeie agterlynspel ook twee keer gaan druk. Die tuisspan se vaste vyf wat die skrums oorheers het, was een te veel vir Barbarians. Dit was juis net voor rustyd en na goeie skrumwerk deur die tuisspan toe hulle agter die pale gaan druk het. Die rustydtelling was 19-12 in die guns van Crusaders.
In die tweede helfte het die tuisspan se swaarder agtal stelselmatig die oorhand in die vaste fasette begin kry en Babaas onder druk geplaas. Boonop moes hul beste lynstaanspringer, Daniel Abrahams die veld verlaat met ‘n kniebesering. Barbarians het moedig terug geveg en by tye aanskoulike rugby gespeel. Justin Bhana (vleuel), nog ‘n spoetvraat wat sy terugkeer gemaak het, het Barbarians se ondersteuners op hul agtervoete gehad met sy kronkellopies en bedrieglike systappies. Voorlangs was dit weer eens Babaas se kaptein Bradley Sumaro wat ‘n barshou gespeel het.
Vir Barbarians het Clinton Wannies en Justin Bhana elk twee drieë gedruk, terwyl Macdelin Saayman met drie doelskoppe en een strafskop geslaag het.
Barbarians se B-span klop Crusaders se B-span met 18-17 terwyl Babaas se C-span met 13-19 teen Crusaders se C-span verloor.
Progress
Barbarians kom môre, Saterdag 3 September, teen Progress van George op D'Almeida Park, Mosselbaai te staan. Die eerste wedstryd skop om 13:00 af en Mosselbaaiers word genooi om Barbarians te kom ondersteun.