Kobus Potgieter blink uit
Werner Botha en sy span van Nashua het op Woensdag, 14 September weer getrou hulle maandelikse gholfdag op die Mosselbaai-gholfbaan suksesvol aangebied. Die 158 spelers wat hulle talente in die individuele Stablefordkompetisie kom uitstal het, het uitmuntende gholf gespeel.
Kobus Potgieter was egter op sy allerbeste en met 44 punte op sy kaart het hy die wenners-kampie as onbetwiste wenner betree. Adin van Aswegen het self 43 punte opgestapel en het as naaswenner die podium betree. Op 41 punte het die uittel-stelsel beslis dat Noël Domingo die derde plek sou inneem met Wynand Stander in die vierde plek. Op 81-jaar het Gerhard Pool met 40 punte in die vyfde plek, sommer baie jong manne in die stof laat byt.
Saterdag
Die heerlike lenteweer wat die 144 spelers
Saterdag, 17 September begroet het, het ‘n huppel in oud en jonk se stap gebring. Die beterbal houespelkompetisie het van meet af aan die manne hulle beste gholf laat speel. Twee ou karperde, JJ Joubert en Karools Hauptfleisch, was in ‘n verwoestende bui en het behoorlik hulle opponente met 61 houe in die skadu gestel.
Die naaswenners, André Middel en Roelof Engelbrecht het met 64 houe net nie genoeg skietgoed gehad om die wenners te troef nie, maar was suksesvol in die uittel-proses. David Bourhill en Wynand Liebenberg (64 houe), asook Alfred du Plessis en Gavin Reynolds (64 houe) was onderskeidelik derde en vierde. In die vyfde plek op 66 houe het pa-en-seun, Barend en Riaan Kotzé by die agterdeur ingeglip.
Lede moet nou reeds ‘n aantekening maak dat die klub se jaarlikse algemene vergadering geskeduleer is om op Woensdag, 28 September om 19:00 in die klubhuis plaas te vind.