Mosselbaai JOC: ‘Ons bly oop vir vennootskap’
Raadslede, voorsitters en verteenwoordigers van die buurtwagte en gemeenskapspolisieforums het vandeesweek ‘n inligtingsessie by die Mosselbaai-munisipaliteit se gesamentlike beheersentrum (JOC) bygewoon om op die hoogte van die jongste verwikkelinge te kom.
“Die munisipaliteit se mandaat wat veiligheid betref, het te doen met die afteken van bouplanne en dies meer, maar omdat ons bewus is van misdaad-statistiek en graag ‘n veilige omgewing wil skep vir ons inwoners, stap ons die tweede myl,” het die uitvoerende burgemeester, raadsheer Dirk Kotzé tydens die byeenkoms gesê.
Die portefeuljevoorsitter vir gemeenskapsveiligheid, raadslid Leon van Dyk het dit duidelik gestel dat die gesamentlike beheersentrum oop is vir almal. Hy het ook ‘n ope uitnodiging gerig aan buurtwagte om by die sentrum in te skakel, juis omdat hulle ook reeds belê het in die infrastruktuur wat gemeenskapsveiligheid by uitnemendheid dien. Van Dyk het veral verwys na die aantal veiligheidskameras waarvan die beeldmateriaal na die JOC se kringtelevisie-observasiekantoor herlei word.
“Ons wil graag die buurtwaglede inkorporeer om nadat hulle die nodige addisionele opleiding en skandering ondergaan het, ook in te skakel by die observasiekantoor. Op hierdie manier bly hulle volhoubaar en daadwerklik by misdaadvoorkoming betrokke,” het Van Dyk verduidelik.
Kotzé en Van Dyk het beide daarna verwys dat beter samewerking met alle partye in die veiligheidsektor essensieel tot die JOC en gemeenskapsveiligheid se sukses sal bydra maar dat hierdie samewerking binne ‘n wetlike korrekte raamwerk moet geskied.
Van Dyk het met die buurtwagte wat in terme van die departement van gemeenskapsveiligheid se beleid geregistreer is, bedank en genoem dat van die 46 bestaande buurtwagte, reeds 37 hierdie formele stap geneem het.
Daar is ook goeie nuus in terme van die uitbreiding van Mosselbaai se veiligheidskamera-netwerk, aldus Van Dyk.
“Ons is druk besig om met die sakesektor te gesels sodat die kamera-netwerk in die omgewing van Louis Fourieweg versterk kan word en dit sluit ook ander areas in die dorp in.”
Kotzé het weer eens beaam dat die oogmerk is om Mosselbaai met ‘n veiligheidsnet te dek wat nie swak plekke het nie.
Verdere samewerking is bewerkstellig met die buurtwag in Bayview wat versoek het dat ‘n ou kragperseel in Hannes Pienaarstraat aan hulle beskikbaar gestel word. Die Raad het hierdie versoek toegestaan en die perseel vir hergebruik beskikbaar gestel vir gebruik deur die buurtwag, asook munisipale verkeer- en wetstoepassingsbeamptes. Selfs die Suid-Afrikaanse Polisiediens sou dit in die piekseisoen ‘n nuttige satellietbedieningspunt kon maak.
“Die munisipaliteit is oop vir alle vennootskappe wat gemeenskapsveiligheid betref,” het Kotzé opnuut bevestig.
Vandag, 30 September lê die Wes-Kaapse parlement se staandekomitee vir maatskaplike ontwikkeling en gemeenskapsveiligheid besoek af by die JOC om verdere ontwikkeling en samewerking met Mosselbaai te bespreek.