Plaaslike skilder stel sy skilderye ten toon
Cobus Lombard, 'n plaaslike waterverfkunstenaar van formaat stal eersdaags van sy unieke waterverf-skilderye tydens die Somer Kunsskou by die Picasso’s Kunsgalery in Mosselbaai uit.
Lombard is ‘n afgetrede professionele landmeter wat vir 35 jaar in Brits en Hartbeespoort suksesvol gepraktiseer het.
‘n Ander groot liefde van Lombard is Arabier-perde. As stokperdjie het hy vir baie jare gepoog om mooi suiwer Arabier-perde te teel. Hy het dan ook sy eie perde afgerig en intensief kompeterend deelgeneem aan Arabier-perdeskoue op verskeie plekke in die land. Arabier-perde is in baie van sy sketse en waterverf-skilderye te sien.
Hy is ook versot op Mosselbaai en op veral die pragtige ou sandsteengeboue in Mosselbaai. Hy hou ook daarvan om die bekende mooi sandsteengeboue en ligtorings te skilder.
Nog iets wat Lombard inspireer, is die mooi karaktervolle gesigte van die volstruise wat op die plase naby Mosselbaai te sien is. Vroeër vanjaar het hy besluit om tonele van die oorlog tussen Rusland en Oekraïne te skilder wat nogal interessante effekte gehad het. Daar is heelwat van die oorlogstonele op die uitstalling te sien.
Mosselbaaiers
Lombard het 30 jaar gelede ‘n klein houthuisie op die rand van die see in Danabaai gekoop waarin hulle al die jare heerlik vakansie gehou het. Hulle is nou al vir ongeveer vier jaar permanente inwoners hier in Mosselbaai. Cobus se vrou Petro het ook verlief geraak op ‘n pragtige ou sandsteen dubbel-verdieping woning in Montagustraat in die ou dorp wat sy bekom het. Die egpaar geniet die rustige atmosfeer in die ou dorp met die asemrowende uitsig op die hawe.
Lombard se uitstalling vind by die Picasso’s Kunsgalery by die Blue Shed Koffie Roostery in Blandstraat 33, Mosselbaai plaas. Sy skilderye is vanaf Maandag, 3 Oktober te sien. Die amptelike opening van die uitstalling sal op Maandag, 10 Oktober om 10:00 plaasvind.