Buig die boompie
Die Laerskool Denneprag is in ‘n prentjiemooi omgewing in Ruiterbos geleë maar die lewe van 60 kinders wat hier van ‘n voedingspropgram by die skool afhanklik is om ‘n voedsame maaltyd in te kry, se lewe is allermins ‘n sprokiesverhaal. Die skool het ‘n groentetuin wat tans die voedingskema ondersteun maar vanweë finansiële druk, het die skool hulp nodig. Ruiterbos het 750 inwoners waarvan 200 kinders is. Armoede is ‘n werklikheid en die skool se tuin kan daarom ‘n bydrae lewer om nog mense in die gemeenskap te voed.
Die Mosselbaai-munisipaliteit het met DROPS (Direct Relief of Poverty and Sickness) gesels oor samewerking in onder meer landelike gebiede. DROPS is ‘n nieregeringsorganisasie wat op besparing fokus en hoe om voorheen agtergeblewe landelike gemeenskappe se lewenskwaliteit te verbeter.
DROPS het verlede week, 22 September ‘n 5 000 liter watertenk, kunsmis, saad, saailinge en ook ‘n groot hoeveelheid tuinmaaktoerusting aan die skool geskenk.
Die Mosselbaai-munisipaliteit ag die ontwikkeling van kinders as ‘n kernprioriteit en glo dat hierdie projek kan bydra tot die kinders se groei en ontwikkeling ten einde hulle staatmakerlede van hulle gemeenskappe te maak.
Die onderburgemeester, raadsheer Cliffie Bayman, wat ‘n besonderse sagte plek vir landelike gemeenskappe het, het die oorhandiging bygewoon en die jongspan sterkte toegewens met hulle projek. Hy het ook sy opregte dank uitgespreek teenoor DROPS vir hulle belegging in die verbetering van die mense in die Ruiterbos-gemeenskap se lewenskwaliteit.
Hierdie projek dra ook by tot die Mosselbaai-munisipaliteit se strategie om ‘n groener en gesonder omgewing vir alle inwoners te help skep.