Volkskerk vier 80 jaar van genade
Die Volkskerk van Afrika in Mosselbaai wat op 20 September 1942 gestig is, het oor die naweek van 24-25 September, hulle 80ste bestaansjaar gevier.
Die tema vir die geleentheid was "80 Jaar van Genade".
Saterdagoggend op Erfenisdag, het baie gemeentelede om 10:00 in Georgeweg byeengekom op die terrein waar die gemeente hulle eerste kerk gekoop het na die stigting van die gemeente op 20 September 1942. Die gemeente het die klipgebou in Georgeweg by suster Marjorie Hermanus gekoop wat 'n winkel daarin bedryf het. Die klipgebou is toe herbou om as 'n kerk te dien. Die kerkgebou is op 23 Junie 1948 in die naam van die kerk oorgedra en die gemeente het vir 11 gelukkige jare hulle aanbidding daar gedoen. Die laaste diens in die klipkerk was die 1959 Oujaarsnagdiens.
Vanaf Georgeweg het die prosessie wat die 80ste bestaansjaar gevier het na die plek beweeg waar die volgende aanbiddingsplek was. Na vele onsuksesvolle aansoeke om hulp van die munisipaliteit om grond vir ‘n aanbiddingsplek te kry, het die kerk ‘n saal in Tarka gehuur. Die gebou is deur ons voorvaders as 'ontoegewyd en onwenslik' vir godsdiensoefening beskou omdat dit ook as ‘n bioskoopsaal vir die Tarka-gemeenskap gebruik is. Nadat die saal afgebrand het, moes die gemeente weer soek na ‘n nuwe aanbiddingsplek. Die gemeente het toe na die huidige kerkperseel verhuis waar eers ‘n saal in 1971 en later die huidige kerkgebou in 1992 voltooi en in gebruik geneem is. Die gemeente was dan ook bevoorreg om dr Beyers Naudé as gasprediker by die kerk se inwydingsplegtigheid in 1992 te hê.
Miernes van bedrywighede
Met die viering van die Kerk se 80ste bestaansjaar was dit behoorlik 'n miernes van bedrywighede. Kranse is gelê by beide bogenoemde plekke waar voorheen aanbid is. Vanaf die Tarkasaal is die trompoppies van die gemeente begelei deur die plaaslike verkeerspolisie en die brigade van die
All Saints kerk in van die strate van
Die gebou is deur ons voorvaders as ‘ontoegewyd en onwenslik’ vir godsdiensoefening beskou.
die buurt tot by die huidige kerkgebou.
‘n Basaar wat deel was van die hoogtepunte van die naweek het onmiddellik in aanvang geneem. Potjiekos, hoenderbraai, vis en skyfies en roosterbrood met verskeie lekkernye daarop was aan die orde van die dag en is aan die buitekant van die saal verkoop. In die saal was die heerlike tradisionele basaareetgoed met koeke, terte en nagereg ook te koop.
Die erediens op Sondag, 25 September was die hoogtepunt van die feesvieringe. Die moderator van die Volkskerk van Afrika Genootskap, ds Louis Jansen van Gqeberha, het die diens waargeneem met die vise-moderator ds Leon Smith van Belgravia in Kaapstad wat as liturg opgetree het.
Verder is die feesgangers ook vergas deur die teenwoordigheid van die Scriba-Synodi, ds Ebramilde Booysen en ds Garrett Möller wat vir 22 jaar ‘n leraar van die gemeente was, sowel as me Sylvia Crotz, vrou van die ontslape ds Leslie Hugh Crotz wat ook voorheen ‘n voltydse leraar van die gemeente was.
‘n Kranslegging deur drie van die oudste lidmate in die kerk het tydens die erediens plaasgevind waarna die gemeente die gesang, Fading Away, gesing het. Die diens is afgesluit met die sing van die kerk se nasionale lied, Onze Volkslied.
Na die diens is van die gemeentelede vergesel deur die aanwesige leraars na die kerkbegraafplaas waar daar ook ‘n krans gelê is ter nagedagtenis van ons voorgangers. Die dag is afgesluit met ‘n fees-ete by die Ridgeview Primêre Skoolsaal.
Ds Neil Smith, die plaaslike leraar, die kerkraad en die gemeentelede wil almal bedank vir hulle bydrae oor die afgelope 80 jaar en sê die grootste lof en eer kom God toe wat vir 80 jaar ons elke dag gedra het. - Joey Daniels is die kerk se tesourier.