Outeniqua rolstoelwedloop verwelkom sterre in hul midde
Die 19de OCC – 'n rolstoelwedloop uitsluitlik vir gestremdes, wat atlete vanaf nege provinsies en van lande regoor die kontinent verwelkom – vind op Saterdag, 15 Oktober by Carpe Diem-skool in George plaas.
Na ‘n lang onderbreking wat deur Covid-19 veroorsaak is, is die dorp in rep en roer om die sterre van ‘rystoelwedrenne' weereens in hul midde te verwelkom. Terugkerende aanspraakmakers op top podium-posisies sluit in Justine Asher, Pieter du Preez en Stuart McCreadie.
Net so noemenswaardig is ‘n jongeling wat beslis geen OCC-vreemdeling is nie. Toe hy teen sewejarige ouderdom vir die eerste keer die resiestoneel betree het, is Zach Legward beskou as Afrika se jongste handfietsryer en hy het reeds vyf OCC goue medaljes op sy kerfstok.
Hy het die Cape Town Cycle Tour se Junior-roete voltooi en het ‘n plek in die rekordboeke losgeslaan vir sy deelname aan die 50km Momentum Knysna-fietstoer in 2018. Zach het ook aan die 94.7-wedren deelgeneem en met spesiale vergunning 50km van die roete afgelê.
Toe daar die laaste keer oor hierdie mededingende jongman se prestasies gerapporteer is, het die pandemie nog nie die planeet op sy kop gedraai nie. Die Legwards het in Kaapstad gewoon en Zach het pas 12 jaar oud geword.
Toe daar verlede week met pa Geoff Legward gepraat is, was daar duidelik tonne water onder die brug deur sedert Zach se laaste mededingende besoek aan die strate van George. Die Legwards het intussen na Pretoria verhuis waar die 15-jarige Zach dit geniet om die New Hope-skool by te woon.
Hy het ook ‘n omvangryke, vyf uur-lange operasie verduur, waarna hy ongeveer 90 dae in die hospitaal deurgebring het. Zach is gebore met Gastroskisis – ‘n toestand waar die ingewande buite ‘n baba se liggaam ontwikkel. Korrektiewe chirurgie kort ná geboorte het tot komplikasies gelei wat sy onderlyf verlam gelaat het.
“Hierdie keer moes Zach se hele maag herbou word. Toe ons by die Rooi Kruis Kinderhospitaal aankom, is daar vir my gesê dat hy net ‘n 30%-kans op oorlewing het. Maar ek het hom op 25 Maart 2020 teruggekry – en ons kyk van toe af nét vorentoe!”
Geoff sê voor die operasie het enigiets wat Zach geëet het eenvoudig vasgesteek wat geweldige pyn veroorsaak het. Deesdae eet hy net wat hy wil en neem geen medikasie of selfs aanvullings nie. Hy maak gereed vir die OCC op 15 Oktober en wil dan sy pad oopren na Knysna en uiteindelik weer Kaap se kant toe.
Ter voorbereiding vir die OCC 2022 behels Zach se oefenprogram dat hy elke tweede aand ‘n 45-minute sessie op die ‘roller’ inwerk – dit is ‘n binnenshuise apparaat waarvan die moeilikheidsgraad verstel kan word om meer weerstand te bewerkstellig. Oor naweke is dit ooppad toe en doen hy oefenrondtes van 25-30km per oefenrit.
Geoff bedank borg Master Power Technologies se uitvoerende hoof, Menno Parsons vir sy ondersteuning, en vir Zach se afrigter, Johan van Rensburg wat ook as lugverkeerbeheerder by OR Tambo Internasionaal werk. “Johan is ’n rolmodel vir my seun.”
Zach wil dieselfde loopbaan volg en geniet dit al vir jare om modelvliegtuie en helikopters deur die lug te laat sweef. ‘n Onlangse hoogtepunt was om in ‘n Bell 222 Helikopter-simulator te vlieg. Hy is ook 'n goeie skut en Geoff sê sy seun het nie een nie maar twee nooiens op die oomblik. “Zach verduidelik hy verkies om sy opsies oop te hou...”