Mosselbaai se medici die wenners op Erfenisdag
Die baniere van Denzil Kleu Eiendomme het Woensdag, 21 September weer hoog gewapper toe 144 entoesiasties gholfspelers vir die individuele Stablefordkompetisie by die Mosselbaai-gholfbaan opgedaag het. Goeie tellings word deesdae aangeteken en George Ferns (voorgee 16) se 42 punte was genoeg om die wenstreep eerste oor te steek.
Jarno Loubser het vanaf ‘n voorgee van 6 die pap dik aangemaak en sy 40 punte het hom as naaswenner laat eindig. Drie spelers het op 39 punte om die oorblywende pryse baklei, maar na die uittel-proses afgehandel is, het Frans Smith (3de), Erick Barkhuizen (4de) en Wessel van Wyk (5de) geëindig. Dankie aan die Denzil Kleu Eiendommespan wat elke maand so puik hulle dag aanbied!
Saterdag
Jy kon Saterdagoggend, 24 September behoorlik die opgewondenheid voel bruis onder die 160 spelers wat aan die beterbal stablefordkompetisie deelgeneem het. Die geure van braaivleis en die spitbraai wat reeds van vroeg-af aan die gang was, het gehelp om ‘n feestelike en opgewonde gees by die klub te skep. Alles was in voorbereiding vir die kragmeting tussen die Springbokke en Argentinië wat om vyfuur sou afskop.
Die medici, Alwo Dercksen en Gys Wilson, se diagnose en beplanning op die baan was in die kol en op 49 punte is hulle as die dag se wenners gekroon. Arie Kadé en Sarel Jansen van Vuuren het tot die laaste putjie hulle bes gedoen, maar op 47 punte het hulle in die tweede plek ingeskuif. David Bourhill en Nick van Noordwyk (46 punte) het na die uittel in die derde plek ingeskuif met oudpresident, Paul Brits en Albie Ellman in die vierde plek. Gielie Gagiano en Bart Saayman (45 punte) het in die vyfde plek geëindig en kon Erfenisdag gaan afsluit met ‘n heerlike braaipak.