Nog poskantore sluit
Die poskantore op Hartenbos én Klein-Brakrivier is die afgelope naweek gesluit. Volgens die Suid-Afrikaanse Poskantoor
(Sapo) is hulle al 'n geruime tyd finansieel in die knyp en kon nie die agterstallige huur betaal nie.
Na wat verneem word, het Sapo die eienaar van die perseel by Hartenbos meer as R370 000 geskuld en hoewel die rekening intussen betaal is, is die herstelkoste om die posbusse uit te haal en 'n maand se huur steeds agterstallig.
Die eienaar van die Hartenbosperseel wat nie sy naam genoem wil hê nie en op Mosselbaai woonagtig is, het aan Mossel Bay Advertiser gesê die poskantoor se kontrak het in Maart reeds verval. "Ons het gesê ons gaan nie die kontrak hernu indien die agterstallige huur nie vereffen word nie. Die poskantoor het daarna self kennis gegee dat hulle nie ons perseel verder gaan gebruik nie."
Inwoners geraak
Die eienaar sê hulle het op Vrydag, 30 September die sleutels van die gebou ontvang. Intussen sit inwoners van die omgewing met hulle hande in hul hare weens die skielike sluiting.
Die Advertiser het die afgelope week die poskantoor by Hartenbos besoek en talle inwoners wat onbewus van die huidige stand van sake was, wou hulle pos uithaal, maar het aan dooiemansdeur geklop. Hartenbos se poskantoorverbruikers is intussen na Mosselbaai se poskantoor verwys.
Inwoners van die Hartenbos Versorgingsoord het aan die Advertiser gesê Hartenbos het talle bejaarde inwoners waarvan baie nie rekenaar-geletterd is nie. "Die poskantoor was ons enigste toevlug tot onafhanklikheid en om ons besigheid self te doen." Nog 'n inwoner het gesê dit was maklik en vinnig om na die poskantoor te stap.
Sommige inwoners het hul poskantoorfooie vir die huur van posbusse, vooruit betaal.
Klein Brak
Op Woensdag, 5 Oktober was die poskantoor by KleinBrakrivier met die Advertiser se besoek gesluit. Alhoewel baie poskantore in Suid-Afrika se instapdiens reeds vroeër weens die krisis gesluit het, het die posbusse behoue gebly.
'n Kennisgewing wat teen die deur by die Klein Brak-perseel opgeplak is, sê die poskantoor is tydelik gesluit weens agterstallige huur.
Die Advertiser het onlangs berig oor die sluiting van die poskantoor by Danabaai nadat Sapo se uitvoerende hoof, Nomkhitha Mona, aangekondig het dat meer as 130 takke landswyd gaan sluit omdat baie van die poskantore op kleiner dorpe en in woongebiede teen 'n verlies bedryf is.