Skarrelhuis ‘n plek van hoop
'n Loodsprojek van die werksoek-eenheid, bekend as Die Skarrelhuis is op Maandag, 3 Oktober amptelik in Groot-Brakrivier deur die uitvoerende burgemeester van die Mosselbaai-munisipaliteit, raadsheer Dirk Kotzé geopen. Volgens raadsheer Kotzé, glo hy dat die projek 'n sukses gaan wees omdat verskeie gemeenskap-organisasies en inwoners van GrootBrakrivier betrokke was om die projek van die grond af te kry en om Die Skarrelhuis gereed te kry.
Raadslid Annatjie Janse van Rensburg van Wyk 4, Herman Swanepoel 'n komiteelid van Wyk 4, Ronald Hacquebord voorsitter van die Groot-Brakrivier Belastingbetalersvereniging en die Groot Brak Rotariërklub het die inisiatief geneem om die Skarrelhuis 'n werklikheid te maak.
Hacquebord beskryf dié proefprojek as 'n oplossing vir 'n probleem wat al jare lank ongelukkigheid onder inwoners veroorsaak en die afgelope paar maande vererger het.
Swanepoel wat ook die waarnemende voorsitter van die Groot-Brakrivier Besigheidsforum is, verduidelik dat werksoekers op die hoek van Langstraat en die Sandhoogtepad bymekaar gekom het, om opgelaai te word vir werk, maar dat dit 'n baie onveilige situasie geraak het. "Daar is nie skuiling en ablusiegeriewe of veilige parkering vir mense wat die werkers wou oplaai nie."
Die Skarrelhuis-projek bied 'n oplossing met Schumanaine Blokland wat as kantoorassistent aangestel is om 'n databasis van werksoekers op te stel.
Mense kan dan skakel om te verneem oor die beskikbaarheid van werksoekers en die werkers kan dan ook veilig op- en afgelaai word. Swanepoel sê dat die loodsprojek net suksesvol kan wees as almal saamwerk. Raadslid Janse van Rensburg het plaaslike kunstenaar Lynda Murison en inwoners bedank wat Die Skarrelhuis versier en betyds gereed gekry het vir die amptelike opening.
Friemersheimer John Keyser was die eerste werksoeker wat sy besonderhede kom opgee het en is ook ‘n getuigskrif van die eerste suksesverhaal in minder as ‘n week na die projek amptelik geopen is. Keyser het reeds ‘n betrekking ontvang en begin vandag, 7 Oktober werk. Die Skarrelhuis se nommer is 071 537 8317.
Die Skarrelhuis-projek bied ‘n oplossing met Schumanaine Blokland wat as kantoor-assistent aangestel is om ‘n databasis van werksoekers op te stel.