AfriForum wys hul entrepreneur aan
Bertha Lewis van Pretoria is aangewys as AfriForum Sakenetwerk se Entrepreneur van die Jaar by 'n spoggerige geleentheid wat op 29 September in Groot-Brakrivier gehou is.
Lewis is die eienaar van Lingi, 'n Afrikaanssprekende teddiebeer wat kinders leer van kleure, digbundels, stories en die ledemate van die liggaam. Lewis is ’n oudioloog en spraakterapeut wat verseker dat kinders presies weet hoe om woorde korrek uit te spreek en om nuwe woorde aan te leer.
René Kleynhans, eienaar van Intiem Weddings in Pretoria is aangewys as die wenner van die Netwerker van Formaattoekenning. Kleynhans het tydens Covid-19 vir paartjies die geleentheid gebied om klein troues te hou en nou kan sy naweke nie voorbly met troues en kosmaak nie.
Die beoordelaars by vanjaar se kompetisie was Mia Louw (Inhoudsregisseur van Winslyn), Annette Muller
(Hoof uitvoerende beampte by Flexy Force), Elmarie Berry (eienaar van Berry Good
Foods en mede-eienaar van Samesyn), Johan Beukes (Besigheids-, lewens- en leierskapafrigter) en
Marco van Niekerk (hoof-uitvoerende beampte van Outdoor Investment Holdings).
Sanderien van der
Walt, die bestuurder van AfriForum Sakenetwerk sê hoewel daar groot pryse op die spel is, is die kompetisie ook uniek danksy die platform wat dit aan die wenner bied. “Die wenner se produkte of diens word wyd op verskillende sosiale-mediaplatforms versprei, asook op nuusplatforms soos Pretoria FM, Maroela Media en Forum Tydskrif. Ons wil met dié kompetisie plaaslike entrepreneurs aanmoedig en beloon. Ons sien hulle harde werk raak en harde werk is noodsaaklik om in Suid-Afrika suksesvol te wees.” Sy voeg by dat die finaliste in vanjaar se kompetisie bewys het dat Suid-Afrikaanse en veral Afrikaanse entrepreneurs geen einde aan kreatiewe vermoë het nie. Mareli Swanepoel, projekbestuurder by Akademia vertel dat dié instansie
’n trotse vennoot is van dié Afrikaanse entrepreneurskompetisie wat elke jaar nóg groter en beter raak. “Die kompetisie skep die ideale geleentheid vir entrepreneurs wat ’n publisiteitshupstoot nodig het en uitstekende advies van kundiges in die gebied wil ontvang. Ons sien uit om die kompetisie volgende jaar verder uit te bou en om kennis te maak met nóg entrepreneurs wat ’n verskil in hulle gemeenskappe maak.”