Gemeente wys hul dankbaarheid
Die Volle Evangelie Kerk se Hartenbosgemeente het die naweek van 1-2 Oktober hulle 21ste jaar herdenking gevier met 'n naweek van dank, sang en lofprysing.
Die bekende sangers Danie Botha en Manie Jackson het Saterdag in die kerk wat bekend is vir sy blou sinkdak, opgetree. Die kerk was pragtig versier met rangskikkings van blomme en ballonne.
Daar was 'n groot verskeidenheid eetgoed wat heerlik voorberei en voorgesit is.
Danie het sy optrede moeiteloos afgewissel met sang, prediking en aanhalings uit die Bybel.
Manie het die gehoor geboei met sy besondere stem en die mededeling van sy eie bemoedigende getuienis.
Een van die kerklidmate, Maxie Willemse het as die seremoniemeester opgetree.
Die burgemeester van Mosselbaai, Dirk Kotzé het Saterdag, tussen Danie en Manie se optredes, 'n toespraak gelewer. Hy het genoem dat Godsdiens vir te lank "onder 'n klip begrawe was" en apart van die sekulêre lewe en politiek bedryf is en hy is van mening dat dit nie apart van mekaar mag wees nie. "God is die begin van alles" het Kotzé gesê. Sondag, 2 Oktober is ‘n Nagmaaldiens gehou en daarna is ‘n dankfees gehou. Die naweek se herdenkingsfees is voorafgegaan deur maande se noukeurige beplanning en voorbereiding.
Dr Louis Schutte is reeds vir 21 jaar, sedert die stigting van die gemeente, betrokke as die gemeente se pastoor. In 'n kort toespraak by die Saterdag-vieringe wat hy saam met sy vrou Michele bygewoon het, het hy gesê: "’n Seeman word in die oopsee gekweek, nie in die hawe nie". Hy het erken dat daar oor die 21 jaar ook "baie storms was".
Die puik organisasie het gesorg dat die vieringe baie glad verloop het. Almal wat betrokke was by die herdenkingsfees is deur Maxie bedank.
Die klem het geval op 'n nederige dankbaarheid vir al God se goedheid en genade in die loop van die 21 jaar van die gemeente se bestaan.