Top sakeleiers en sakekamers vanjaar met eerbewyse vereer
Sakekamers, besigheidseienaars, kleinboere en gasvryheidsondernemings van die hele SuidAfrika het nog tot Maandag, 10 Oktober kans om in te skryf vir die MyAHi-eerbewyse wat ’n gesogte jaarlikse kompetisie vir dinamiese sakelui is.
Waar die fokus voorheen op uitsonderlike sakekamers in die Wes-Kaap was, het die Afrikaanse Handelsinstituut Wes Kaap vanjaar besluit om ook die ekonomiese bydrae van besigheidseienaars, kleinboere en die rol van opkomende sakekamers landswyd te erken.
Die AHi Wes-Kaap se uitvoerende direkteur, dr Willie Cilliers, sê nie minder nie as ses eerbewyse word tydens ’n gala-prysuitdelingsfunksie op Donderdag, 3 November toegeken. Die inskrywings vir die eerbewyse sluit op Maandag, 10 Oktober waarna die top drie finaliste in elke kategorie op Maandag, 17 Oktober bekendgemaak sal word.
Die ses eerbewyse wat by die gala-aand se prysuitdeling oorhandig gaan word, is onder meer die Sakekamer van die Jaar, Opkomende Sakekamer van die Jaar, Kleinsakebesigheid van die Jaar, Beginner-besigheid van die Jaar, Kleinboer van die Jaar en Gasvryheidbesigheid van die Jaar.
Cilliers sê: “Met vanjaar se MyAHi-eerbewyse wil ons sakeeienaars en sakekamers vereer wat ondanks die pandemie en al die gepaardgaande ekonomiese uitdagings tog vindingryke maniere gevind het om met hulle kliënte of lede te kommunikeer.
Die MyAHi-eerbewyse is dikwels die grootste erkenning wat sulke kleinsake-eienaars kan ontvang.”
Die MyAHi-aankondiging volg ná Statistieke Suid-Afrika se onlangse droewige aankondiging dat die werkloosheidskoers nou 34,5% beloop, nadat dit in die vierde kwartaal van 2021 35,3% was.
Die MyAHi-eerbewyse dien as ’n beloning vir entrepreneurs wat vir werkskeppingsgeleenthede sorg en sakekamers wat uit die boks dink om hul lede by te staan.
Die wenners van die eerbewyse sal by 'n gala-geleentheid by die Protea Marriott Hotel in George bekendgestel word. Dit sal gevolg word met ’n kongres die volgende dag by dieselfde plek.
"Met die kongres gaan ons die beste kundiges kry om lig te werp op hoe die toekomstige sakekamers sal lyk, sowel as die transformasieproses,” sê dr Cilliers. “Ons sal ook die rol bespreek wat kleinbesighede in die ekonomie speel.”
Christo van der Rheede, uitvoerende direkteur van Agri SA, sal die gasspreker wees tydens die galageleentheid en ook aansluit by ’n paneel van deskundiges gedurende die paneelbespreking tydens die kongres.
Kaartjies vir dié glansryke geleentheid sal nog beskikbaar gestel word.
Sakekamers en Opkomende Sakekamers:
Die digitale inskrywingsvorm vir die MyAHi Sakekamer van die Jaarkompetisie is nou oop. Ons is ook opgewonde om ’n nuwe kategorie by te voeg, genaamd Opkomende Sakekamer van die Jaar.
Alle sakekamers is welkom om in te skryf vir dié kompetisie.
Vul gerus die vorm in by: https:// forms.gle/5AWLiTKC34ebg6xC8
Kleinsakebesighede, Beginnerbesighede, Kleinboere en Gasvryheidbesighede:
Gedurende die koronaviruspandemie het die MyAHi gesien hoe besigheidseienaars en kleinboere uit hul pad gaan om met innoverende idees die alledaagse uitdagings aan te pak.
"Ons wil dus vanjaar uitstaande besigheidseienaars en kleinboere beloon wat ten spyte van al die uitdagings presteer het."
Die wenners sal voordeel trek uit groot media-blootstelling en ook pryse ontvang.
Het u wat dit vat om aangewys te word as die MyAHi Kleinsakebesigheid van die Jaar, MyAHi Beginner-besigheid van die Jaar, MyAHi Kleinboer van die Jaar of die MyAHi Gasvryheidbesigheid van die Jaar?
Vul gerus die vorm in by: https:// forms.gle/QS5rZLixfYcYZdqr5
Intekenaars en die publiek sal die geleentheid kry om vir hulle gunsteling kleinsakebesigheid, beginner-besigheid, kleinboer, gasvryheidbesigheid, opkomende sakekamer of sakekamer deur middel van ’n digitale menings-peiling, te stem.
Die meningspeiling (stembus) sluit op Maandag, 24 Oktober om middernag. Daarna sal die wenners van elke kategorie met die prysuitdeling op Donderdag, 3 November bekend gemaak word.
Vir meer inligting besoek www. myahi.co.za.