Span jou breikragte in vir die maak van vroetelmoue
Helpende Hand, Wes-Kaap:
Vir mense met demensie of alzheimersiekte het 'n vroetelmou dieselfde sussende uitwerking as 'n kombersie vir 'n kind.
'n Breinaald-projek is deur Helpende Hand begin om alzheimer- en demensie-pasiënte se hande en verstand besig te hou terwyl hulle aan die vroetelmoue peuter. Volgens Alisha de Lange, streekorganiseerder van Helpende Hand, in die Wes-Kaap, wil mense wat met demensie of alzheimer leef dikwels aan iets peuter.
"Hulle trek of byt aan hul klere, bal hul vuiste saam, vryf hul vingers teen mekaar of krap soms selfs hulle arms stukkend. Hulle raak ook angstig en geïrriteerd as hul nie uiting aan hul emosies kan gee nie. Dit lei soms tot gewelddadige gedrag. Deur middel van die vroetelmoue wat mense brei help hulle pasiënte om hul rusteloosheid daarmee te verminder en verskaf dit ook ure se stimulasie en pret."
Items soos gebreide wurms, krale, knopies, klokkies, lint, spons of selfs net stukkies wol kan vir die doel gebruik word. Studies by versorgingseenhede het gewys dat hierdie soort moue baie voordelig is vir die gemoedstoestand van demensie- en alzheimerpasiënte.
Vir mense wat nie kan brei nie, is daar ook vroetelkomberse wat baie gewild is onder vrywilligers wat wel kreatief 'n bydrae wil lewer.
Volgens De Lange het hulle 446 vroetelmoue ontvang wat by 15 tehuise in die Wes-Kaap afgelewer is.
As jy nie 'n brei-foendi is nie, maar steeds 'n bydrae wil maak, kan jy wol by jou naaste Helpende Hand-tak aflaai, of jy kan 'n vroetelkombers maak of 'n finansiële bydrae lewer. Vir meer inligting, stuur 'n epos na alisha@helpendehand.co.za