Brandwag-sport gaan weer kook
Meer as 270 deelnemers gaan vanjaar vanaf 15 tot 16 Oktober aan die Burgemeesterstoernooi op Brandwag deelneem. Hierdie rugby- en netbaltoernooi is vir die eerste keer in Oktober 2018 aangebied en vorm sedertdien jaarliks deel van die Mosselbaai Sport- en Rekreasiefees. Dit het spesifiek sportontwikkeling in die landelike gebiede ten doel, asook die verryking van die gemeenskap binne die konteks van sosiale regenerasie wat deel van die Mosselbaai-munisipaliteit se kernwaardes binne die Groei-strategie is. Die toernooi bied ook geleentheid vir talentvolle sportmanne en -vroue in landelike gemeenskappe om hulle vaardighede ten toon te stel. Die toernooi word by die Brandwag-stadion aangebied op 15 Oktober om 09:45. Die wedstryde begin beide dae om 11:00 en die wenners word op 16 Oktober omstreeks 17:45 aangekonding met die prysuitdeling wat om 18:00 plaasvind. Spanne wat deelneem, sluit in Mossel Bay Titans, Proteas, Groot-Brakrivier, Hungry Lions, Happy Hearts, Thistles, Shamrocks en Black Warriors wat mekaar op 15
Oktober sal pak. Op 16 Oktober word die uitdunrondes gespeel. ‘n Program van die wedstryde is aanlyn beskikbaar op die munisipaliteit se Facebookblad, Mossel Bay Municipality.
Touchies-toernooi
Vandag, 7 Oktober vind die Touchiestoernooi by die D’Almeida-stadion plaas waartydens R22 000 as prysgeld gewen kan word.
Twintig spanne met kleurvolle name vat mekaar aan vanaand tydens die toernooi.
Die aksie begin om 18:00.
Die spanne is verteenwoordigend van die groter Mosselbaai, met deelnemers wat van tot sover as Herbertsdale aan die toernooi deelneem. Ook wat die ouderdomme betref, is daar van skolespanne tot hardebaarde van in die veertig jaar oud. Wedstryde word op drie velde tegelyk gespeel in eerste, tweede en finale uitspeelrondes om die top ses spanne te bepaal.
Die aksie word verfilm en sal digitaal uitgesaai word deur DigiTV. Die toernooi sal tot ongeveer 22:00 voortduur.