Vier seiljagte maak klaar
Net vier seiljagte het die Mossel Bay Race (MBR) seiljagresies voltooi wat Donderdag, 29 September by Simonstad begin en Saterdag, 1 Oktober in Mosselbaai geëindig het.
Die MBR is 'n kwalifiserende vaart vir die uitdagende Cape to Rio-seiljagresies en gee bemanningslede die geleentheid om hulle vaardighede op te skerp.
Die seiljag wat eerste in die Mosselbaai hawe aangekom het, was Wallbanger met Jed Hewson as kaptein.
Die Maker's Mark met James Cregeen as kaptein, was tweede. Geoff Genricks die kaptein van Serendipity en sy bemanning het Saterdagoggend in die Mosselbaai hawe aangekom in die derde plek. Shaun Verster, kaptein van Suidoos11 was vierde en is die enigste bemanning wat Saterdagaand in Mosselbaai oorgebly het.
Die ander drie seiljagte het binne 'n uur weer die 40-uur lange terugvaart, aangepak.
Uitdagende weersomstandighede
Steve Casey van die Valsbaai-seiljagklub, die seiljagresies-beampte wat moes seker maak dat alles glad verloop, vertel dat die seiljagte in moeilike omstandighede begin het met 'n baie sterk suid-oostelike wind wat reg van voor gewaai het.
Volgens Casey is die MBR-resies baie uitdagend en vereis besondere fisiese krag en tegniese kennis en ervaring. Hierdie vaardighede is veral Donderdag tydens die wegspring getoets met 'n baie sterk suidoostelike wind wat gewaai het. Dié wind het die aand bedaar en Vrydagoggend het 'n westelike wind gewaai wat vir ‘n goeie vaart gesorg het.
Die resies is 80 jaar oud en is sowat vyf jaar gelede weer ingestel om seiljagvaart op die oopsee te bevorder. Volgens Mark Furness, direkteur van Toerisme by die Mosselbaai-munisipaliteit, is dié seiljagvaartresies ikonies en ondersteun dit die dorp se toerismeveldtog as Ikoniese Mosselbaai.