Haweloses neem toe
Hawelose mense wat snags en ook bedags op sypaadjies in Mosselbaai oop en bloot lê en slaap en by inwoners en toeriste bedel, neem sigbaar toe. Besoekers aan die onderdorp word veral deur honger bedelaars gekonfronteer. Dit gebeur ten spyte van kennisgewings wat bedelary verbied wat onlangs deur die Mosselbaai-munisipaliteit by Die Punt opgerig is. Die probleem duur voort.
Hoewel Mosselbaai oor The Havennagskuiling beskik, blyk dit asof die skuiling nie alleen die sosio-ekonomiese probleem kan verlig nie.
Die kwessie van hawelose persone is ‘n uitdaging waarvoor daar geen kitsoplossings is nie, sê die munisipaliteit in 'n verklaring.
"Ekonomiese uitdagings wat teweeg gebring word deur hoër krag asook brandstofkoste, het uiteindelik ‘n impak op lewenskoste. Hierdie faktore dra by tot ‘n toename in werkloosheid in veral die laer besoldigde werksgeleenthede. Net soos wat Mosselbaai die top semigrasie-bestemming vir hoër besoldigdes is wat hierheen stroom, geld dieselfde vir persone wat ‘n laer inkomste verdien," sê munisipale bestuurder, Colin Puren.
Puren sê soms beland hierdie persone juis op straat omdat hulle 'n beter lewe in Mosselbaai kom soek het en werksgeleenthede tans besonder skaars is.
Die burgemeester, Dirk Kotzé het die afgelope Dinsdag, 11 Oktober 'n ongeskeduleerde besoek aan die nagskuiling gebring. Rayleen Pretorius, 'n werknemer by die nagskuiling het bevestig dat The Haven 80 persone kan huisves, maar dat daar tans slegs 50 inwoners is.
Wetstoepassers
Puren sê wetstoepassers werk dag vir dag om hawelose persone te verwyder waar hulle ‘n stoornis veroorsaak en teenstrydig met munisipale bywette optree.
"Voorts, word plekke wat as herberg op straat of in die natuur dien, gereeld opgeruim. Skoonmaak-aksies, veral by die taxi-staanplek in die sentrale sakekern is so onlangs soos middel-September gedoen."
Met die MossHope-projek van die munisipaliteit se direktoraat gemeenskapsdienste, word ondersteuning aan haweloses gebied wat ooreenstem met die doelwitte van die nagskuiling.
Die doel is om hawelose persone weer in die samelewing te integreer en waar moontlik, met hulle geliefdes te herenig.
Van die munisipaliteit en The Haven se strategiese vennote is die departemente van gesondheid en maatskaplike ontwikkeling asook die ACVV.
Getal
Die munisipaliteit sê dit is tans moeilik om ‘n presiese getal van die aantal haweloses in Mosselbaai te bevestig. Maatskaplike werkers verbonde aan MossHope het
egter genoem dat hulle sedert Mei tot Oktober met 40 persone wat by die program ingeskakel het, onderhoude gevoer het.
Volgens Lindie Edwards voorsitter van die Onderdorp-buurtwag en vise-voorsitter van die Mosselbaai-gemeenskapspolisieforum, bly een van die grootste uitdagings om te verseker dat inwoners hulle daarvan moet weerhou om aalmoese van enige aard aan haweloses te gee. “Op hierdie manier, word hawelose persone eintlik in hulle kwaad gesterk om op straat te bly.”
Gemeenskap
“Die gemeenskap kan ons hand baie sterk deur wat hulle gee, aan die regte instansies te gee,” sê raadslid Lodewyk Coetzee in wie se wyk, 'n groot gedeelte van die onderdorp, juis die brandpunt van die hawelose probleem is.
Coetzee sê die kwessie van haweloses is nie een wat oornag en met die gebruik van een platform aangespreek kan word nie.
‘n Gemeenskapsvergadering word deur die Mosselbaai-munisipaliteit in die vooruitsig gestel, waar die kwessie van haweloses op ‘n oop platform met die tersaaklike rolspelers en die publiek bespreek sal word.
"Ons móét met ons gemeenskap kommunikeer. Wat belangrik is om binne rekening te bring, is dat die kwessie van haweloses nie een is wat ons oornag kan aanspreek nie. As ‘n gemeenskap, moet ons deernis en dissipline op ‘n innoverende manier toepas. En dit kan ons net bewerkstellig as ons saam na hierdie kwessie gaan kyk en insette dienooreenkomstig gaan lewer," sê Kotzé.
'n Datum vir die beplande vergadering was teen die ter perse gaan nog nie bekend nie.