Nuwe blaastoestel uiters waterdig
'n Nuwe blaastoestel, die Dräger Alcotest, sal na verwagting vanaf einde Oktober 2022, net betyds vir die feesseisoen, deur die Mosselbaai-munisipaliteit gebruik word as bewyslewering tydens vervolgings van beweerde oortreders wat bestuur onder die invloed van alkohol.. Die Dräger sal in die munisipaliteit se spesiaal toegeruste mobiele eenheid gebruik word om verkeersoortreders vas te vat.
Senior staatsadvokaat, Christhénus van der Vijver,van die kantoor van die Direkteur van Openbare Vervolgings in Kaapstad, het onlangs opleiding aan Mosselbaai se staatsaanklaers gegee oor hoe die Dräger werk en om hoe om die sake in die hof aan te bied.. "Daar was 'n toetssaak in 2011 in die Wes-Kaapse hooggeregshof, waartydens die Direkteur van Openbare Vervolging (DOV) tesame met Regshulp die spesifieke model se voorganger betrek het. Die DOV het op die stap besluit omdat daar voortdurende agterdog oor die akkuraatheid van die instrument was.
Die hof het tydens uitspraak in die spesifieke saak bevind dat hierdie wyse om alkohol in 'n persoon se asem te toets 'n betroubare metode is, alhoewel daar probleme was met die kalibrasieproses van die instrument aangesien sekere komponente van die instrument gekalibreer was deur die vervaardiger. Kalibrasie moet egter deur ‘n geakkrediteerde laboratorium gedoen word.’n Verdere probleem wat tydens die toetssaak na vore gekom het, was dat daar oor ‘n tydperk veranderinge aangebring was aan die spesifieke instrument, terwyl die nasionale spesifikasie nie ook dienooreenkomstig aangepas was nie. "
Die daaropvolgende vyf jaar het die DOV in samewerking met die Wes-Kaapse departement vir vervoer en ander belangrike rolspelers soos die Suid Afrikaanse Buro vir Standaarde (SABS) die probleme wat tydens die toetssaak aan die lig gekom het, reggestel en onder andere is ‘n nuwe nasionale spesifikasie opgestel.
Die huidige Dräger verskil van sy voorganger in onder andere in die volgende twee opsigte: daar sal nou van 'n motoris verwag word om twee asemmonsters te gee en vervolging sal ingestel word op die laagste van die twee en ‘n tempe-ratuurmeter sal verseker dat elke persoon se asemtoets teen dieselfde temperatuur, naamlik 34 grade Celsius gemeet word. Indien ‘n motoris weier om te blaas, of hy kan nie blaas nie, sal hy/sy dadelik vir 'n bloedmonster geneem word.
Paasbolletjies
Sosiale media het onlangs op hol gegaan nadat 'n persoon 'n paasbolletjie geëet het en die alkohol in die asemmonster toe oor die toegelate perk was. Van der Vijver het dit duidelik gemaak dat dit ‘n totale wanpersepsie geskep het. “Eerstens is dit nie die Drager instrument wat gebruik was nie maar ‘n sogenaamde ‘screener’ wat nie gebruik word vir hofdoeleindes nie, en tweedens sal die Dräger onmiddellik aandui indien daar alkohol in die mond gevind word en nie ‘n lesing gee nie.
Die Dräger neem net lug wat diep vanuit die longe kom en 15 minute moet verloop vandat 'n motoris in hegtenis geneem word totdat die toets afgelê word.”
Volgens Van der Vijver sal alkohol in hierdie gegewe tydperk in die mond verdamp. Hy sê verkeersbeamptes kan steeds 'n gewone blaastoestel gebruik om vas te stel of ‘n persoon oor die toegelate perk is, en indien wel, sal die persoon geneem word vir die toets met die Drager teneinde ‘n uitslag te kry wat gebruik kan word vir hofdoeleindes.
Meetsisteme
Die Dräger-toestel beskik oor twee meetsisteme wat die alkohol in die asem asook die konsentrasie daarvan analiseer. ‘n Rekenaardrukstuk hiervan word gelewer. Indien die toets aandui dat die voertuigbestuurder die limiet van 0.24 milligram per 1000 milliliter of in die geval van bestuurder met ‘n openbare vervoerbestuurspermit, die limiet van 0.10 milligram per 1 000 milliliter oorskry, sal die persoon in hegtenis geneem word en voor die hof moet verskyn.
Die Mosselbaai-munisipaliteit sê alle verkeersbeamptes word die nodig opleiding gegee om die toestel volgens regulasie aan te wend.