Laaste eerbetoning vir Nomaphelo
Die 23-jarige verdagte wat van die moord op Nomaphelo Pantsi, (21) 'n student van Suid-Kaap Kollege in Heiderand aangekla word, het sy borgaansoek op Maandag, 10 Oktober laat vaar.
Die man wat in Thembalethu, George, op 3 Oktober in hegtenis geneem is, nadat hy na bewering van die moordtoneel in Mosselbaai gevlug het, het volgens 'n bron die aansoek laat vaar omdat die gemeenskap gedreig het om hom dood te maak as hy sou uitkom. Die beskuldigde het na bewering reeds 'n vorige veroordeling.
Die borgaansoek is uitgestel tot 2 November.
Liggaam deur kinders gevind
Volgens polisiewoordvoerder, sers Chris Spies, is Nomaphelo se liggaam, Sondag, 2 Oktober deur kinders ontdek wat in die bosse naby Bokwestraat in KwaNonqaba gespeel het. Haar liggaam was naak en sy het 'n oop wond aan haar gesig gehad.
Begrafnisdiens en optog
'n Huisdiens word Saterdag, 15 Oktober, vanaf 08:00 by 69 Greenfield, White Location in Knysna gehou waarna die begrafnisdiens daarna by die Chris Nissan Laerskool in Knysna sal plaasvind.
Die sekretaris van die Suid-Kaap Kollege se studenteraad, Masibulele Nyabaza het bevestig dat die beplande optog na die KwaNonqaba-polisiestasie steeds gaan plaasvind. "Ons is nou besig met vervoerreëlings vir studente wat Nomaphelo se begrafnisdiens wil bywoon en sal later die datum van die optog deurgee."
Die studente van die Suid-Kaap Kollege, Heiderand, het beplan om Donderdag, 6 Oktober na die KwaNonqaba Polisiestasie te stap, vir 'n vreedsame betoging om hul ongelukkigheid met geslagsgebaseerde geweld en Nomaphelo se dood te toon. Hulle moes die optog uitstel, omdat wetgewing bepaal dat hulle sewe dae voor die tyd skriftelik moes toestemming kry by die polisiehoof van die KwaNonqabapolisiestasie.