Palliatiewe sorg is daar vir gemeenskap
Palliatiewe sorg word in Oktober wêreldwyd gevier om bewusmaking te skep vir die noodsaaklikheid daarvan.
Die @Peace Versorgingsentrum in Mosselbaai het 12 jaar gelede hul deure oopgemaak en fokus op die holistiese versorging van pasiënte. Palliatiewe sorg behels die versorging van pasiënte wat terminaal siek is, ná-operatiewe sorg en rehabilitasie en verligtingversorging van 10 tot 14 dae vir families wat 'n ruskans nodig het.
Volgens Rogeline Brettenny, bestuurder van @Peace, is die 12-bed eenheid meer as 'n hospies en is hulle deure oop vir almal.
Die sentrum dien as 'n step-down vir provinsiale hospitale en is die enigste plek in die Mosselbaai-area wat palliatiewe sorg bied. "Ons verskaf 'n gratis diens aan pasiënte met families wat soms help met bydraes tot die versorging."
Daar is 'n waglys vir nuwe pasiënte en terwyl Mossel Bay Advertiser daar was, het 'n dringende versoek van 'n ouetehuis gekom vir iemand wat terminale versorging nodig het. Ongelukkig was daar net nie plek nie wat dui op 'n behoefte aan meer palliatiewe sorgsentrums in ons area.
@Peace bied na-operatiewe versorging en rehabilitasie
Na-operatiewe versorging en rehabilitasie is een van die dienste wat @Peace Versorgingsentrum verskaf. "Ons het onlangs 'n jongman gehad wat van die hospitaal na ons gekom het met breinskade ná 'n grusame aanval. Daar was min hoop op enige mate van herstel. Ons het begin deur intensiewe terapie met hom te doen wat fisio- en spraakterapie en geheuebokse ingesluit het.
As gevolg van die puik versorging wat hy by @Peace gekry het, het hy na sowat drie maande self hier uitgestap, hy kan praat en homself versorg. "Die pasiënt was baie goed met tegnologie en ons personeel het hom aangemoedig om elke dag met tegnologie te werk. Hy het soveel waardering vir wat ons vir hom gedoen het dat hy gereeld vir ons 'n lekker koek of tert bring wat hy self gebak het."
"Ons het oor die jare baie goeie verhoudings met mense opgebou. Ons hanteer ons pasiente asof hulle ons eie ouers is.
Ons leuse is: 'You cannot add days to your life, but we can add life to your days'."
Kontak die sentrum by 081 757 9048 vir enige navrae of donasies.