LA wink vir SK-sterre
Drie talentvolle musikante het uitsonderlik presteer tydens die afgelope Suid-Afrikaanse kampioenskap van die uitvoerende kunste (Sacopa) wat van 30 September tot 8 Oktober in Rustenburg gehou is. As alles volgens plan verloop, mag 'n paar Suid-Kaapse sterre dalk by die wêreldkampioenskap in Los Angeles uitblink.
Die jongste uitvoerende kunstenaar, Maja Snyman (15), se plek is egter verseker met 'n ten volle betaalde reis vir haar deelname aan die WCOPA in LA volgende jaar van 24 Julie tot 6 Augustus. Hierdie vyftienjarige violis en pianis van Glentana, wat by McKinlay Reid International Academy in George studeer, is gekies as die algehele junior wenner oor al vyf kategorieë (dans, drama, instrumentaal, modelwerk, vokaal). Sy is ook die wenner van die instrumentale afdeling vir juniors.
Die sanger en liedjieskrywer, Christo Esterhuizen (31) is die algehele senior wenner vir die vokale afdeling (mans en vroue), asook die wenner van die vokale afdeling vir senior mans.
Die Pacaltsdorper, Veronique Ferndale (35) is gekroon as die wenner van die vokale afdeling vir senior vroue.
Ander uitblinkers sluit in Brandon Swart (24) van George (1 goud: instrumentaal), Anuchka Henning (26) van Oudtshoorn (2 goud, 1 silwer: vokaal) en Arancha Fortuin (26) van Sedgefield (3 brons: vokaal).
"In ag genome dat sowat 3 000 inskrywings vir die kompetisie ontvang is, met ongeveer 17 000 verhoogitems, is hierdie 'n uitstekende oes vanuit ons distrik," het Sacopa se streekdirekteur van die Tuinroete, Annerie Snyman gesê.
Vanuit die omgewing is Christo, Veronique, Brandon en Anuchka gekies om deel te neem aan die wêreldkampioenskap in Los Angeles, met hul eie befondsing of 'n borgskap.
Hulle word almal verteenwoordig deur Karen Kretschmer en Tracy Lotus Anderson van Alive Life Entertainment.