Jong opkomende jagters voltooi 1ste opleidingsmodule
Die Suid-Kaap Jagters- en Bewaringsvereniging (SJB) het die afgelope naweek weer 'n opleidingskursus vir jong opkomende jagters aangebied.
Die SJB se grootste doelstelling is om ons jeug te ontwikkel. Daarom is die opleiding van juniors een van die prioriteite op die jaarprogram. Die vereniging word beskou as leiers op hierdie gebied omdat hulle verskeie natuur- en jagverwante kursusse oor die jare ontwikkel het wat die kinders aan die natuur blootstel. Hier word gefokus op gesonde maniere van ontspanning waar buitelug-aktiwiteite natuurlik voorkeur geniet. Hierdie kursusse word deur Chasa (Jagterskonfederasie van Suid-Afrika) goedgekeur.
Die studente word reeds as laerskoolleerders blootgestel aan die veldskoolkursus. Dit word oor ‘n periode van etlike dae aangebied. Daar is ook die skietkliniek wat vir een dag deur bekwame en entoesiastiese opleidingsbeamptes aangebied word.
Hierdie laaste opleidingskursus op skoolvlak word in twee modules aangebied. Die eerste van twee modules is so pas afgehandel en is by SJB se opleidingsfasiliteite en skietbaan by KleinBrakrivier aangebied. Elke student kry die geleentheid om onder ervare mentorskap die vaardighede van verskeie tegnieke aan te leer en waar die veilige en oordeelkundige hantering van ‘n vuurwapen die kernaspek is.
Die eerste fase fokus grootliks op veiligheid en die hantering van vuurwapens in verskeie dissiplines. Elke student moet kwalifiseer sodat sy/haar skietvernuf op standaard is voordat hulle toegelaat word vir die volgende module. Module 2 gee hulle die geleentheid om die jagveld te besoek waar hulle dan hul eie springbok kan skiet en verwerk. Met die suksesvolle voltooiing van die kursus (module 1 en 2) word die Chasasertifikaat verwerf waarmee die jongeling kan geregistreer as ‘n toegewyde jagter.
Dankie
SJB spreek hul opregte dank uit aan elke instansie en privaat donateur wat op ‘n gereelde basis bydraes maak om die jeug beter toe te rus vir toekomstige leiersposisies.
Baie dankie aan: Fermi Meyer (George) leier van die groep, Wilhelm Zietsman (Riversdal), Marnus Ferreira (Mosselbaai), Len Nel (Mosselbaai), Christo Engelbrecht (Mosselbaai), Bennie Botha (George) en Ferdi Boll (George) wat opgetree het as mentors tydens die afgelope naweek se kursus. Die belangrikste bydrae was natuurlik om al die monde te voed. "Hiermee ons op regte dank aan Johryn Meyer en Ouma Maryna wat die lekkerste etes en bederfies voorberei het," sê 'n SJBwoordvoerder.
SJB se gewilde ghong-uitdaging (spanskiet) vind op 19 November by De Rust plaas. Vir meer inligting hieroor kontak 044-695
2319 of besoek die webtuiste info@ suidkaapjagters.co.za