MMA motorfietsryers hou herdenkingsdagparade-rit
Die Tuinroete MOTHS Motorcycle Association (MMA) bied môre, Saterdag 12 November, 'n Herdenkingsdagparade-rit vanaf George na Mosselbaai aan.
"Hierdie is 'n geleentheid om ons motorfietsgemeenskap te herenig deur 'n ontbytrit te deel, aan 'n massa motorfietsrit deel te neem en om deel te wees van 'n parade waartydens diegene van die omgewing wat hul lewens tydens verskeie oorloë verloor het, vereer word. Hierdie is nie 'n morbiede gebeurtenis nie, maar sal jou eerder opgewonde maak – wees egter gewaarsku dat daar harde seinkanonvuur gaan wees. Almal wat deel hiervan gaan wees, is welkom om 'n kruis of ‘n poppyblom, wat deur ons verskaf sal word, by die senotaaf by Die Punt in Mosselbaai neer te lê ter herinnering aan die gestorwenes," sê Anthony van Tonder van die Memorable Order of the Tin Hats (MOTHS).
Roete
Alle belangstellende motorfietsryers is welkom om deel van die parade te wees. Die koste van R100 per persoon sluit 'n ontbyt in. Die parade begin by die Outeniqua Shellhole in Rijk Tubaghstraat, George, waar almal ‘n koppie koffie kan geniet. Om 07:45 vertrek almal van hier en ry in ‘n groepformasie tot by Hartenbos Seefront vir 'n MMA-ontbyt by die Spur. Spesiale parkering vir diegene wat aan die parade deelneem, is by die Hartenbos Seefront gereël.
Om 10:05 vertrek almal in ‘n massarit vanaf Hartenbos Seefront tot by die senotaaf by Die Punt. Diegene wat R100 inskrywingsgeld betaal het, sal ook ‘n metaal 2022-jaarbalkie ontvang.
Om 'n plek te verseker, volg die instruksies op www.lest-we-forget.co.za. Laat-betalings sal ook by die Outeniqua Shellhole of die Spur aanvaar word. "Saterdag is spesifiek vir motorfietsryers en op Sondag, 13 November om 10:40, bied die MOTHS van Mosselbaai weer 'n Herdenkingsdagparade aan. Enige iemand is welkom om Sondag se geleentheid by te woon.
Dit is 'n uitstekende geleentheid om ons jonger generasie te herinner aan die opofferings wat ons helde gemaak het en is die ideale geleentheid vir 'n gesinsuitstappie," sê Moth Anthony. Hy kan ook by 082 467 3365 gekontak word vir enige verdere navrae.
‘Hierdie is nie ‘n morbiede gebeurtenis nie, maar sal jou eerder opgewonde maak.’