GRDM sit bal aan die rol
Geduld is verlede Woensdag, 2 November beloon toe die eerste sooi gespit is vir die bou van 'n moderne brandweerstasie vir die Tuinroete-distriksmunisipaliteit (GRDM). Die projek kom al 'n lang pad en Memory Booysen, burgemeester van die GRDM, het die seremonie in George waargeneem.
Hy is onder meer bygestaan deur Grant Riddles, Hessequa-burgemeester, Leon van Wyk, George-burgemeester en Gert van Niekerk, onderburgemeester van die distriksmunisipaliteit.
Bouwerk sal in die middel van hierdie maand begin en die gebou sal na verwagting teen die einde Junie 2023 gereed wees om in bedryf gestel te word. Dit word teen 'n koste van R11, 6 miljoen opgerig en sal 'n oppervlakte van 5 877 m2 op twee erwe beslaan in die Tamsui Industriagebied.
Monde Stratu, die Tuinroete se munisipale bestuurder, het tydens die geleentheid gesê dis die gevolg van 'n lang proses. Vir baie jare al het die distriksmunisipaliteit gepoog om sy eie geriewe te kry.
Hy het sy dank teenoor George-munisipaliteit uitgespreek vir die beskikbaarstelling van die grond. Hy het ook ander belanghebbendes bedank vir hulle bydraes.
Clive Afrika die bestuurder-gemeenskapsdienste van die GRDM, het 'n oorsig gegee van die aanloop tot die bou van die nuwe stasie. Die distriksbrandweerdiens is oorspronklik in 1987 met 14 vrywillige brandweerbeamptes begin. Dit het oor die jare gegroei en vandag is daar 40 permanente lede.
Leon van Wyk, George se burgemeester, het gesê dat hy daarna uitsien om die nuwe stasie te sien. Dit is 'n belangrike toevoeging vir George en die Tuinroete.
Memory Booysen het gesê dat alles klein begin en vir hom is die brandweerstasie 'n
droom wat waar geword het.
Gert van Niekerk, onderburgemeester van die GRDM, het gesê almal wat teenwoordig
is, is deel van 'n geskiedkundige dag en dit is 'n ware bewys van wat bereik kan word as entiteite saamwerk.