Veelsydige en talentvolle beroepsvrou se prestasies
Tarita Mostert woon die afgelope 16 jaar in Reebok. In die afgelope 20 jaar het sy deur verdere studies haarself so bemagtig met kennis dat sy tans op 38-jarige ouderdom 'n veelsydige en talentvolle beroepsvrou is.
Tarita Mostert het nadat sy in 2002 aan die Hoërskool Transvalia in Vanderbijlpark gematrikuleer het, gewoeker met haar talente en sy het sedertdien 'n verskeidenheid van kwalifikasies verwerf wat aan haar verskeie opsies van beroepe gee. In 2006 verwerf sy 'n onderwyslisensiaat in klavier aan die Universiteit van SuidAfrika (Unisa). 'n Jaar later voltooi sy haar LL.B aan Unisa en word in 2010 toegelaat as prokureur.
Vier jaar later in 2014, verwerf sy 'n B.Compt-graad ook aan Unisa. Sy het twee ingeskrewe klerkskappe vir toelating as 'n prokureur en ook as 'n rekenmeester voltooi. 'n Jaar later in 2015, word sy ook toegelaat as ‘n notaris-publiek.
Sedert 2017 is sy werksaam as rekenmeester by Lumenrock op George wat nou deel is van die Origin Financial Group of Companies.
Sy is tans die groep se risikobeampte en praktiseer ook in haar eie hoedanigheid as 'n prokureur en notaris. Haar beroep vereis dat sy dikwels by virtuele vergaderings betrokke is.
Terwyl sy in die beroep staan, studeer sy verder en verwerf in 2018 'n LL.M-graad met spesialisering in belastingreg aan die Nelson Mandela Universiteit in Port Elizabeth. In 2021 behaal sy die PhD-graad met spesialisering in belastingreg aan die Rhodes Universiteit in Grahamstad. Hierdie jaar het sy die graad , “Executive MBA”, aan die Swiss School of Business and Management (SSBM) verwerf.
Drie weke gelede is Mostert gekontak en meegedeel dat sy ‘n besondere toekenning by The South African Institute of Professional Accountants (SAIPA) ontvang het.
"Ek was nie bewus van die feit dat my werk vir hierdie kompetisie ingehandig is nie," vertel sy. "Blykbaar werk dit so dat die Suid-Afrikaanse universiteite geselekteerde doktorale proefskrifte by SAIPA inskryf," sê Mostert. Sy is op 2 November by 'n gala-geleentheid bekroon met 'n prysgeld van R20 000 en met SAIPA se Accountancy Top Achievers awards competition in die kategorie Doctor in Philosophy in Taxation vir 2022. Hierdie veelsydige en talentvolle vrou is beslis 'n aanwins vir die groter Mosselbaaien Tuinroete-gemeenskap en met al die kennis wat sy verwerf het, is sy beslis 'n voorbeeld vir ons jongmense. Sy is veral 'n rolmodel vir ons beroepsvroue wat deur selfbemagtiging vir niemand hoef terug te staan nie.