Mosselbaai ikonies met Ironman
Mosselbaai het op Sondag, 6 November vir die eerste keer die Isuzu Ironman 70.3 aangebied en volgens alle aanduidings was die dag 'n reuse-sukses.
Sowat 2 000 atlete wat 15 professionele atlete ingesluit het, het aan hierdie eerste Ironman-kompetisie wat in die Wes-Kaap gehou is, deelgeneem.
Hulle het om 07:30 op 'n pragtige, windstil Sondagoggend in verskillende afdelings en tydgleuwe met 'n 1.9km swem in die see begin.
Die tweede been van die driekamp-kompetisie was 'n fietsrit op 'n sirkelroete van 90km waar die atlete by die Gouritzriviervallei op die R327 naby Herbertsdale omgedraai het vir die laaste skof van 45km terug na Mosselbaai.
Teen 10:00 het die temperatuur al heelwat gestyg en Mosselbaai se op- en afdraandes het dit moeilik gemaak vir die atlete om die laaste been van 21.1km padwedloop te voltooi. Familielede, ondersteuners en vrywilligers het gehelp om die atlete aan te moedig en te vermaak om die lang pad 'n bietjie korter te maak.
Vir die Suid-Afrikaner, Magda Nieuwoudt wat tweede geëindig het in die vrouekompetisie, was die roete fantasties en die reëlings baie goed. Sy sien uit daarna om volgende jaar weer hier deel te neem.
Paul Gillingham, 'n driekamp-atleet van Kaapstad wat al in verskeie kompetisies oor die wêreld heen deelgeneem het, het die seetemperatuur en swem as perfek beskryf, die fietsry as moeilik maar billik vir sterker ryers en die op- en afdraandes van die hardlooproete as uitdagend.
Hy voel dat Mosselbaai Ironman 70.3 die potensiaal het om die beste kompetisie van sy soort in die wêreld te word.
Manswenner
In die mansafdeling het Suid-Afrikaners koning gekraai met Bradley Weiss eerste by die wenstreep in 'n totale tyd van 03:50:37. Matt Trautman wat vir 'n groot deel van die wedloop voor was en eers by die 17km merk van die hardlooproete, deur Weiss verbygesteek is, was tweede met 'n tyd van 03:51:22 net 44 sekondes ná die wenner.
Cameron MacNair was in die derde plek met 'n tyd van 04:06:27.
Vroue-wenner
Die vroue-wenner was Emma PallantBrown van Brittanje met 'n tyd van 04:23:26. Sy het so pas derde gekom in die Ironman 70.3 Wêreldkampioenskap wat in St George, Utah in Amerika gehou is. Pallant-Brown is met 'n Suid-Afrikaner getroud en bly nou in Pretoria. Nie alleen het sy die vrouekompetisie gewen nie maar sy het ook die negende plek in die algehele kompetisie vir mans en vroue behaal. Magda Nieuwoudt van Pretoria was tweede met 'n tyd van 04:32:26 en Julie Aspesletten van Noorweë eindig in die derde plek met 'n tyd van 04:43:31.
Die volledige uitslae van die Mosselbaai Isuzu Ironman 70.3 kan afgelaai word op die IRONMAN Tracker toepassing (wat op iOS en Android) beskikbaar is. Vir meer inligting besoek www.ironman.com/im703mossel-bay.