Hond waarsku inwoner oor inbrekers
Die inwoner van Mosselbaai wat op Maandag, 13 Februarie in die vroeë oggendure 'n vermeende inbreker by sy woning doodgeskiet het, se
10 maande oue hond het hom gewaarsku dat daar aktiwiteit by sy huis was.
Polisiewoordvoerder, ao
Kappie Kapp sê die voorval het om ongeveer 03:00 in Koningklipstraat gebeur. Die huiseienaar het aangedui dat hy nie aan die Mossel Bay Advertiser oor die voorval wil kommentaar lewer nie.
‘n Familielid van die huiseienaar met wie die koerant gepraat het, het egter gesê die voorval was baie traumaties en moeilik vir die huiseienaar om te verwerk. “As familie is ons baie dankbaar dat sy hondjie, wat hy sowat ‘n maand gelede gekry het, hom wakker gemaak het. Dit kon soveel anders uitgedraai het.
“Hoeveel keer hoor ‘n mens nie van huisbrake waar inwoners in hul huise aangeval word met noodlottige gevolge vir die onskuldige eienaars nie.”
Parool
Die Advertiser het teen die ter perse gaan verneem dat die oorledene nog nie formeel deur enige familielede uitgeken is
nie en dat die polisie met die hulp van sy vingerafdrukke sy identiteit moet bepaal.
Die polisie het egter 'n sterk vermoede wie die oorledene is.
Hy was 35-jaar oud en was op parool ten tye van die voorval nadat hy vroeër op 'n aanklag van roof skuldig bevind is.
Verskeie inwoners het op die Advertiser se Facebook-blad kommentaar gelewer oor die feit dat daar 'n moorddossier na aanleiding van die voorval geopen is.
Kapp sê dit is standaard prosedure dat wanneer iemand aan onnatuurlike oorsake dood is, die polisie 'n moorddossier moet open. "Die saak word ondersoek en niemand is nog in verband met die voorval in hegtenis geneem nie."