Duitsers hoor noodkrete van St Blaize-slagoffer
'n Man wat Sondag, 12 Februarie by die bekende St Blaize-staproete gegly en na benede gestort het, het waarskynlik sy lewe te danke aan 'n Duitse egpaar wat hom hoor gil het. Gustav (71) en Mare (61) Nagel van Keulen (Cologne) in Duitsland, is op 'n tweeen-'n-half maande besoek aan Suid-Afrika en het vir drie dae in Mosselbaai gekuier toe die voorval gebeur het.
Hulle het verlede jaar die St Blaizestaproete gestap en dit was só besonders dat hulle dit weer wou doen. Hulle het om ongeveer 16:30 'n man se noodkrete gehoor. Gustav vertel dat die persoon op 'n ander paadjie was, maar dat dit baie ruig en te gevaarlik vir hom was om af te klim en die man te help. Hy het dadelik die noodnommer 112 gebel en is vol lof dat dié nommer, wat internasionaal gebruik word ingeval van nood, dadelik beantwoord is.
Sy vrou, Mare voeg by dat hulle baie bly is dat hulle toevallig daar was toe die man geval het. Dit het geklink asof hy in erge pyn was. In sulke gevalle is elke minuut
van belang en ons kon aan die nooddienste uitwys waar die man gelê het.
Die egpaar wil graag hulle beste wense aan die man oordra en hoop dat hy vinnig sal herstel. Mosselbaai se nooddienste het saam met die NSRI twee spanne gevorm om na onder te klim om die man te bereik. Hy is op die terrein vir 'n gebreekte sleutelbeen en enkelfraktuur behandel en in 'n harnasmandjie na bo getrek waar hy gestabiliseer is en toe na die Mosselbaai Hospitaal vervoer is. Hy is later oorgeplaas na die ortopedie-afdeling van die George Hospitaal waar hy behandeling ontvang. Volgens 'n woordvoerder van die hospitaal, is die man 35-jaar oud en gaan dit onder omstandighede goed met hom.
Die area waar die man Sondagmiddag van die kranse afgeval het. Onder is die reddingspan by die beseerde man om hom te stabiliseer.