Ondersteun die dinamiese vroue
Dynamic Women for Children (DWFC) het op 29 Januarie vanaf Johannesburg begin stap om fondse vir behoeftige kinders in te samel. Dié staptog eindig vandag, Vrydag 17 Februarie, by Hartenbos Seefront.
Die staptog is om die publiek bewus te maak van die behoeftes onder 'n groot aantal kinders in Suid-Afrika en dit is deel van DWFC se Cape2Care Projek.
Die onbaatsugtige passie en poging van DWFC is tot groot voordeel van talle kinders en dit dien ook as aansporing vir baie mense om self betrokke te raak in hulle gemeenskappe.
Erika Myburgh, eienaar van Meraki Project Management en Meraki Wellness, was saam met Marleen van der Walt van 2008 tot 2012 by hierdie NPO organisasie in Pretoria betrokke en was dan ook sodoende deel van die stigtingsproses en die eerste groeipyne.
Nadat Erika en haar gesin in 2012 na Mosselbaai verhuis het, het Marleen en haar dogter Michelle, die bestuur van DWFC in totaliteit oorgeneem.
Erika sê: "Ek ken vir Marleen al vir baie jare en die liefde en passie wat sy vir kinders het, is baie besonders. DWFC is nie net ‘n liefdadigheidsprojek of deeltydse aktiwiteit vir haar nie. Dit is haar lewe.
"Nadat ek uitgevind het hul staptoer eindig hierdie jaar by ons in Hartenbos, het dit vir my die idee gegee om hierdie geleentheid van DWFC te gebruik vir die plaaslike bewusmaking daarvan en om die gemeenkap se eie betrokkenheid by kinders met behoeftes te bevorder. Meraki Wellness beplan tans die Bravehearts Fundraiser Walk, ten bate van kinders in ons eie gemeenskap vir volgende jaar en hierdie is ‘n gulde geleentheid om die suksesverhaal van DWFC met ons gemeenskap te deel, ter voorbereiding van ons eie projek vir volgende jaar."
"Ons beplan om die projek tesame met plaaslike besighede, bestaande liefdadigheidsprojekte en -organisasies en natuurlik gewillige stappers te doen en om daarmee soveel moontlik fondse in te samel vir verskeie organisasies ten bate van kinders met behoeftes in ons onmiddellike gemeenskap. "Die projek is in samewerking met Rauch Gertenbach Prokureurs gedoen en besighede en organisasies wat reeds 'n aanduiding gegee het van hul beplande betrokkenheid is Meraki Wellness, BL Constructions, Wonderful SA Foundation en Hartenbos Seefront. Ons hoop om nog heelwat van ons besighede en organisasies by hierdie lysie te voeg."
Erika sê die ses vroue van DWFC kom vandag, 17 Februarie teen ongeveer 13:00 by Hartenbos Seefront aan. Meraki Wellness en Rauch Gertenbach Prokureurs het onderskeidelik ‘n span stappers wat vanoggend saam met DWFC in George wegspring om die laaste deel van hul roete mee te maak, tot by Hartenbos Seefront.
"Ons nooi die publiek uit om deel te word van hierdie besondere geleentheid en die brawe poging van hierdie ses dinamiese vroue deur op die uitkyk te wees vir ons op die roete tussen George en Hartenbos tussen 08:00 en 13:00. Kom stap gerus saam met ons vir ‘n paar kilometers, kom spoor ons aan op die pad of wag ons in by Hartenbos Seefront," sê Erika
Enige verdere navrae kan aan Erika (081 457 0306 of meraki2020.office@gmail.com) gerig word.
Vordering van die Cape2Care projek is op Facebook geplaas en inligting is beskikbaar op www.dwfc.org.za/ en www.facebook.com/ Cape2Care/.
Kontakbesonderhede vir DWFC is Marleen (082 574 2693) of Michelle (072 564 7495).
Die staptog is om die publiek bewus te maak van die behoeftes onder ‘n groot aantal kinders.