Santosstrand nou deel van Matriekbaai-makietie
Desember is om die draai, en daarmee saam Matriekbaai.
Lian Fourie, die organiseerder van dié matriekmakietie, sê hulle verwag vanjaar 3 000 plus weekkaartjiehouers.
Dan kom daar dagbesoekers ook by. Fourie sê mense kom van ver en woon dikwels, regdeur die week, een of twee dae van die program by.
Hulle getalle is reeds dubbel van dit wat dit verlede jaar was.
Nog 'n opwindende toevoeging tot die program is die Santos Dagparadys. Dié deel vind tussen 4 en 8 Desember plaas en is daagliks slegs van 10:00 tot 16:00. Daar was 'n effense onduidelikheid onder kaartjie kopers na dié toevoeging, maar Fourie sê hulle is baie opgewonde oor Santos.
Dit is vir 'n ruk lank al in die pyplyn, en die organiseerders het gedink dit sal moontlik volgende jaar eers realiseer. Die toestemming het egter betyds vir hierdie jaar gekom.
'n Deel van Santosstrand sal vir die geleentheid afgesper word en die publiek sal nie daar toegelaat word nie.
Diegene wat Matriekbaai bywoon is nie verplig om die ekstra opgradering vir die Santos Dagparadys te koop nie, maar Fourie sê hulle sien uit na die groei van dié nuwe toevoeging van Matriekbaai. Hulle beplan raakrugby, vlugbal en dagpartytjies kompleet met platejoggies.
In terme van strande se waterlyne sê Fourie Santos was die enigste strand wat sou werk vir hierdie deel van hulle program. Matriekbaai is nie net een groot partytjie nie, maar probeer ook 'n bydrae maak tot die gemeenskap wat hulle ondersteun. Verlede jaar het Matriekbaai R20 000 aan die Mosselbaai Burgemeesterfonds oorhanding asook 2 000 bome geskenk. Matriekbaai sien die bome as 'n nalatenskap vir hul toekomstige families.
Fourie sê hulle wil beslis vanjaar weer 'n skenking maak.
Nog ‘n opwindende toevoeging tot die program is die Santos Dagparadys.