Gemeenskapsuitreik trek talle
Ten spyte daarvan dat die kantoor vir landelike ontwikkeling se gemeenskapsprogram twee keer deur die weer in die wiele gery is, spog dié span daarmee dat hulle by een van die geleenthede minstens 350 mense as gehoor gehad het. Die tema van die uitreik is “My gemeenskap, my trots” (My community, my pride) en is aangebied in samewerking met die SuidAfrikaanse Polisiediens (SAPD), SANCA, en All Nations Helping Hands.
Laasgenoemde is ‘n nie-regeringsorganisasie en het die belangrike boodskappe wat onder die gemeenskap se aandag gebring moes word, suskesvol deur rymklets, dramaopvoerings en sang oorgedra.
Die program is van 25 tot 30 September gehou.
Aangesien die program in die buitelug aangebied word, moes twee van die sessies, een in Tarka en die ander in Sonskynvallei weens slegte weer afgestel word. Die program is egter suksesvol aangebied in Powertown, Uitbreiding 13, Highway Park, asook by Laerskool Groot-Brakrivier, Diaz Primêre Skool en The Havennagskuiling.
Die temas en kwessies wat bespreek is sluit in geslags-gebaseerde geweld, familiekonflik, asook middelafhanklikheid.
Die span berig dat die program groot byval gevind het en dat die inhoud oorgedra deur middel van die uitvoerende kunste, beslis ‘n impak gehad het. In Mountain View, die behuisingskompleks langs Louis Fourieweg, het ongeveer 350 mense nadergestaan vir die program, terwyl ander dit vanuit hulle woonstelle geniet het. Die landelike ontwikkelingspan het innoverend opgetree deur hulle program in die buitelug aan te bied.
Die program het ook gedien om, terwyl dit skoolvakansie is, die jongspan konstruktief besig te hou.
Een van die Mosselbaai-munisipaliteit se fokuspunte binne die GROEI-strategie, is om maatskaplike herlewing deur hierdie tipe programme in die hand te werk.