Plaaslike skoonheid skitter
In 'n skitterende vertoning van talent en skoonheid is
Natasha Geel, 'n 19-jarige van George, as Mej Hartenbos 2023 aangekondig.
Die jaarlikse Mnr en Mej Hartenbos-kompetisie het op Saterdag, 23 Desember tydens 'n lekker kuier-aand by Misty Valley Farm net buite Hartenbos plaasgevind.
Volgens organiseerder en eienaar van Mej Hartenbos (Edms.) Bpk, Trudi Stander, was die beoordeling nie 'n maklike taak vir die span beoordelaars nie.
"Elke jaar het ons merkwaardige individue van regoor Suid-Afrika wat deelneem, en ons is bevoorreg om 'n platform vir hulle te gee om uit te blink. Ons het fantastiese borge aan boord gehad wat al ons finaliste en wenners lekker bederf het," sê Stander.
Saam met Geel is die 24-jarige TikToksensasie van Pretoria, iHope Moriarty, as Mnr Hartenbos 2023 gekroon, terwyl die eerste prins en tweede prins, Wilco Esterhuysen (18) en Ferdi Bergh (22), albei trotse Mosselbaaiers is.
Elani Pienaar (22) van Pretoria is as die eerste prinses gekroon, en Eulize du Plessis (17) van George as tweede prinses.
Die kompetisie het nie nét skoonheid gevier nie, maar ook baie talent en charisma, en bied jaarliks 'n platform vir deelnemers om uit te blink.
Die toewyding van die organiseerders, beoordelaars en borge het gesorg vir 'n suksesvolle geleentheid.
Die beoordelaars was Kiki Smit (eienaar van Foodz Mosselbaai, George en Knysna), Anton Sieber (tweede opvolger
van Mnr SA 2021 en opvolger van Mr Supernational 2022), Elani Pretorius (eienaar van ACE Models, Mosselbaai en George), Dinette Wessels (eienaar van D Studio, Mosselbaai), Stellie Taute (eienaar van Loka Botique), bekende akteur Jacques Gombault en Melody Ralph-Alers (Steps Dance Academy, Mosselbaai) wat ook die choriografie elke jaar behartig.