Uitbuiting van publiek by parkeerterrein

Hendrikje Hartwigsen, Mosselbaai:

Ek wil dit net onder u aandag en die publiek se aandag bring dat die manier wat mens vir parkering kan betaal by Hartenbos se winkelsentrum uiters onregverdig is.

Daar is twee betaalstasies vir parkering. Een by Pick n Pay en die ander by die fontein. Laasgenoemde betaalstasie het 'n baie lang ry van mense gehad wat wou betaal.

Toe dit my beurt was om te betaal sien ek dat daar op die betaalmasjien 'n kennisgewing aangebring is dat die masjien NIE kleingeld uitbetaal nie en ook nie betaalkaarte aanvaar nie.

Ek het slegs R50 gehad om mee te betaal. Die tarief was R20. Dus hou die masjien R30 van my kleingeld.

Dit is uiters onaanvaarbaar. Ek sal beslis Hartenbos se winkelsentum in die toekoms gedurende vakansietye vermy.

Kommentaar: Denise Lloyd, Hartenbos Seefront-bestuurder

Die bankfasiliteit in die betaalstasie word deur Nedbank verskaf. Tot op Vrydag, 22 Desember, kon klante met hul kredietkaarte betaal en ook daarmee tap. Daardie middag het Nedbank se netwerkkaart foutief gegaan en was die bankdiens nie meer beskikbaar nie.

Hartenbos Seefront het die probleem onmiddellik onder ons aandag gebring ‘n nuwe netwerkkaart gekry en die HUB (organisasie wat die masjiene versien) tegnikus het dit kom installeer. Ongelukkig moes die stelsel van Nedbank af hergeprogrameer word en het ons die volgende boodskap ontvang: "We are only able to get that operational after the 3rd January as we need to set an appointment to have that PC application rebuilt on the Parking PC."

Daar is toe spesifiek kennisgewings op die masjien asook teen die muur agter die masjien (sodat klante dit op ‘n afstand kon sien) opgesit.

Die masjien het wel kleingeld gegee, maar nie altyd die regte kleingeld nie, daarom het ons liewer gesê GEEN KLEINGELD nie.

Die skrywer sou dan sy R50 in die masjien kon sit en ses x R5 muntstukke = R30 kleingeld kry (want die masjien gee net munte) of moontlik net R15 of R20 se R2 kry, maar dan het die masjien ‘n klein strokie uitgedruk waarop die balans aangedui word as overpaid.

Klante het dan die geld by die kantoor kom haal, of as dit laat aand was, die volgende dag.

Dus sou klante nie hul kleingeld verloor het nie.

Baie jammer vir die ongerief. Ons het beslis die frustrasie van die gebrek van die gebruik aan bankbetaalfasiliteite gedeel, want dit het ons werk ook ekstra gemaak om die uitbetalings van die kantoor af te doen.

Baie klante het wel ook van die Zapper-fasiliteit gebruik gemaak om hul parkeerkaartjies te betaal.