Help Ricardi om SA te verteenwoordig
Mosselbaai-atleet Ricardi Matthee se groot droom is om vanjaar te kwalifiseer vir die Paralimpiese Spele in Parys. Matthee is 'n siggestremde atleet en sal in die 100- en 200 meter naellope in die T13klas probeer kwalifiseer.
Plaaslik sal Ricardi twee geleenthede kry om te kwalifiseer vir die Spele.
Op 24 Februarie vind die Wynlandse Internasionale byeenkoms in Stellenbosch plaas waar hy in 2022 drie goue medaljes verower het. Op 24 Maart vind die nasionale kampioenskappe in Bloemfontein plaas waar hy sy o.20-titel sal verdedig en ook weer 'n geleentheid sal kry om vir die Spele te kwalifiseer.
Indien hy nog nie kwalifiserende standaarde bereik het nie, sal daar nog 'n geleentheid in Parys wees om dit te vermag waar hy dan ook internasionale blootstelling sal geniet.
Die byeenkoms in Parys is een van vyf Grand Prix-byeenkomste vir paralimpiese atlete, wat van nou tot in Julie beslis word. Behalwe vir Parys, is nog 'n byeenkoms in Barcelona, Spanje, ook deel van die reeks waar Ricardi ook kan probeer om sy stempel af te druk en op sy tye in internasionale geselskap te probeer verbeter.
Soos met verskeie van die kleiner sportsoorte, moet paralimpiese atlete ook hul eie onkostes dra en sy familie het 'n Backa-Buddy-blad geskep om fondse te probeer kry vir die uitgawes: www.backabuddy. co.za/champion/project/ricardimatthee-5764696183713157887. Ricardi oefen verskriklik hard om sy droom te bewaarheid en om veral Mosselbaai trots te maak. Hy het verlede jaar sy matriek aan Curro Mosselbaai voltooi en begin eersdaags met sy studies in kuberveiligheid by die Cyber Security Studies Institute South Africa.