Huis van gruwels
'n Dertienjarige weeskind, wat in die sorg van sy peetpa was, het 'n briefie vir sy tannie saam met 'n maatjie gestuur waarin hy om hulp gesmeek het ná hy vir 'n geruime tydperk na bewering deur sy peetpa seksueel misbruik is.
Die seun se ouers is beide onlangs oorlede waarna hy in die sorg van die verdagte geplaas is.
Die polisie op Mosselbaai se eenheid vir gesinsgeweld, kinderbeskerming en seksuele misdrywe het van die voorval, wat op Heidelberg plaasgevind het, bewus geword en die verdagte (29) die afgelope week in hegtenis geneem.
Die verdagte het probeer vlug maar lede van die gemeenskap het die polisie gehelp om hom vas te keer.
Gruwelike bewerings word ondersoek en die verdagte het glo die slagoffer gereeld met 'n pyp of met sy eie skoolbelt geslaan indien hy nie vir hom daaglikse seksuele gunsies wou doen nie.
Lede van die gemeenskap het aan die Mossel Bay Advertiser gesê die verdagte het die seun na bewering beheer en dat geen van sy maats ooit by sy huis mag gespeel het, indien die verdagte nie by was nie.
In vrees geleef
Die slagoffer het glo in vrees geleef en het 'n paar dae nadat hy die briefie vir sy tannie gestuur het, van die huis af weggehardloop en hulp by sy tannie gaan soek.
Adjudant offisier Soretha van Zyl van die polisie se eenheid vir gesinsgeweld, kinderbeskerming en seksuele misdrywe op Mosselbaai, het die verdagte in hegtenis geneem op aanklagte van verkragting, aanranding met die opset om ernstig te beseer asook seksuele aanranding.
Meer aanklagte mag dalk by die klagstaat gevoeg word soos die ondersoek ontvou.
Die verdagte het Dinsdag in die Heidelberg-landdroshof verskyn en bly in aanhouding by Buffeljagsrivier tot sy volgende verskyning op 12 Maart.
Die slagoffer is intussen in 'n plek van veiligheid geplaas.